BAUKAU, STLTIMORLESTE.com – Projetu reabilitasaun estrada rural husi area Ailemilari too Samaguia, Suku Tekinomata, Postu Administrativu Laga, Munisipiu Baukau, neebe responsabiliza husi kompanhia lokal Nautetu Fatima Unip Lda paradu, tanba laiha razaun neebe klaru.
Xefe Suku Tekinomata, Abílio Diamantino Ximenes esplika, projetu refere Governu liu husi Ministeriu Obras Publikas kontratu kompanhia implementador ho durasaun projetu tinan ida neebe hahu Servisu iha loron 28 Agostu 2023 too 28 Agostu 2024, maibe too ohin loron projetu refere seidauk finaliza, tanba servisu paradu.
“Estrada nee husi star point too natar Samaguia kuaze Kilometru 3 ho balun neebe responsabiliza husi kompanhia Nautetu Fatima nee too agora seidauk too iha nia tarjetu, tanba servisu paradu kuaze fulan ida ona,” hateten Abílio ba jornalista STL iha Samaguia, Kuarta (14/08/2025).
Projetu nee tuir nia distansia kilometru 3 resin neebe implementa ho tipu servisu importante mak hanesan plan concrete, cor semente, gabion no seluk, maibe servisu neebe kompanhia implementa ona iha terenu, mak hanesan konstrui valeta ona, mini ponte no seluk tan neebe konsidera seidauk too tarjetu kontratu neebe iha, tanba servisu sira hanesan ateru, cor, plan concrete kompanhia seidauk implementa too projetu paradu.
Mezmu projetu refere paradu no nain ba kompanhia lakon prezensa iha terenu, maibe material konstrusaun nian no ekipamentu servisu balun neebe kompanhia mobiliza dadaun sei iha terenu fatin projetu.
“Ami sempre aprosima nafatin Tekniku Obras, maibe sira responde depois, mais de depois too agora seidauk bele iha responde,” katak Abílio.
Xefe Suku Tekinomata nee argumentu, relasiona projetu refere paradu, Autoridade Suku aprosima ona Tekniku Obras Publikas Destakadu Munisipiu Baukau atu fo atensaun ba kompanhia refere hodi aselera servisu, maibe seidauk iha rezultadu. Tanba nee husu parte Obras Publikas Destakadu Munisipiu Baukau atu orienta no fo samada ba kompanhia refere nunee finaliza obra refere fo vantajem ba movimentasaun komunidade sira nian ho transporte publiku no privadu.
Liga asuntu nee, STL tenta konfirma Koordendor Tekniku Obras Publikas Destakadu Munisipiu Baukau, maibe la fo komentariu, tanba okupadu servisu.
Entretantu projetu nee ho numeru kontratu MPW-W-280077 ho kilometru projetu 2+300-4+630 responde valor orsamentu US$ 436.794,48 responsabiliza husi kompanhia lokal Nautetu Fatima Unip, Lda.
(tom)
