DILI, STLTIMORLESTE.com – Observador Politika sira foti lian makaas hodi kestiona projetu reabilitasaun estrada iha sidade Dili laran, neebe kontinua uza metodu “Sobu-Monta,” neebe konsideira la efisiente no estraga orsamentu estadu.
Observador Politika, Pedro Xavier Ramos hatete, situasaun nee akontese iha area hanesan Bidau, Bekora, Komoro no seluk tan, sai evidensia katak implementasaun programa la bazeia ba Master Plan sidade nian neebe integradu.
“Ita haree estrada foin mak halo fulan ida deit agora sobu no monta fali ona, nee iha lian politika nian karik dehan jestu dezenvolvimentu neebe la efisiente ka lufu lafu deit,” dehan Pedro ba STL, iha Kaikoli, Dili, Segunda (02/03/2026).
Nia hatutan, metodu “sobu-monta” nee fo prejuizu ba kofre Estadu, osan neebe loloos bele uza hodi dezenvolve estrada iha foho, fakar fali iha sidade deit hodi hadiak buat neebe foin mak halo. Povu iha direitu atu kestiona, tanba nee sira nia osan mak estraga hela nee.
“Se Governu la hadia lalais sistema nee, sei fo impaktu ba konfiansa publiku antes tama ba tinan kampnha foun, tanba povu haree realidade iha uituan uituan rai rahun, engarrafamentu no osan neebe fakar saugati deit,” hatete observador Politika nee.
Iha parte ketak Komunidade Bidau, Aniceto Viera sente triste , tanba esperansa atu hetan estrada neebe diak ba tempu naruk, parese la tuir realidade.
“Ami kontente tanba estrada foin halo, maibe triste fali tanba foin fulan hira deit estrada hahu aat fali ona. Nee hanesan soe deit osan Estadu nian,” dehan Aniceto.
Entretantu antes nee Ministru Obras Publika (MOP), Samuel Marsal hatete, asfatu balun tenke sobu hodi hatama kanteiru foun. Maibe nia garante katak, kompanhia sira iha obrigasaun atu hadia fali estrada ba kondisaun normal.
(car)
