BAUKAU, STLTIMORLESTE.com – Projetu reabilitasaun estrada iha Postu Administrativu Kelikai Antigu, Munisipiu Baukau oras nee paradu.
Administrador Postu Kelikai Antigu, Francisco Matias Gusmão “Junior” informa, reabilitasaun estrada iha Postu Kelikai Antigu neebe implementa iha tinan hirak liu ba responsabiliza husi kompanhia lokal sira, too oras nee kompanhia balun hatudu progresu servisu diak, maibe pakote dahuluk neebe responsabiliza husi kompanhia lokal Flores Unipesoal.Lda, daudaun paradu.
“Faze primeiru nee husi kompanhia Flores Unipesoal.Lda mais como iha dezentendimentu oituan entre kompanhia ho trabalhador sira entaun pauza tiha servisu,” hateten Junior ba STL iha Vila Nova, Domingu (01/06/2025).
Nia sublina, servisu reabilitasaun neebe responsabiliza husi kompanhia Flores Unipesoal.Lda hahu para iha fulan Fevereiru tinan nee, tanba iha dezentendimentu entre trabalhador ho kompanhia.
Dezentendimentu nee mosu, tanba trabalhador deskontente ho valor orsamentu neebe kompanhia kontratu ba trabalhadores sira, nunee Autoridade Postu submete ona karta ba Servisu Munisipal Obras Publikas Baukau hodi haree asuntu refere.
“Hau haruka ona karta ida ba Diriter Obras Publikas no Koordenador Enjineiru destakadu para ita haree asuntu nee para bele kontinua fali servisu,” Junior akresenta.
Diretor Servisu Munisipal Obras Publikas Baukau, Agostinho Ximenes rekoinhese, projetu responsabiliza husi kompanhia Flores Unipesoal.Lda ba reabilitasaun estrada iha Postu Kelikai Antigu paradu iha fulan Dezembru tinan kotuk, tanba implika husi problema sosial.
Nia sublina, relasiona problema neebe akontese parte Obras Publikas Baukau simu ona informasaun no realiza ona enkontru entre kompanhia ho Autoridade Lokal maibe seidauk iha solusaun.
“Nee problema sosial neebe ami mai koalia ona iha nee, mais seidauk foti solusaun ami haruka fali ba Postu, maibe foin dadaun sira enkontru interna iha Suku haruka ona karta mai atu kontinua, neebe hau despaisu ona ba Enjineiru destakadu depois hau hein nia rezultadu,” Nia katak.
Entertantu projetu refere Governu liu husi Ministeriu Obras Publikas kontratu kompanhia refer ho valor orsamentu US$ 510,231.96 responde ba kilometru tolu iha Postu Kelikai Antigu ho tipu reabilita plum concrete, cement masonry, bio enjenharia, gabion neebe implementa servisu iha loron 25 Abril 2022 no tuir planu remata iha loron 25 Abril 2023, maibe too tinan nee fiziku projetu foin atinji 70%.
(tom)
