BAUKAU, STLTIMORLESTE.com – Projetu reabilitasaun estrada urbana Baukau Vila neebe la akontese iha fulan Novembru 2025, tanba Governu inkomoda ho debate Orsamentu Jeral Estadu (OJE) 2026 no preparasaun ba komemora loron 28 Novembru.
Prezidente Autoridade Munisipiu Baukau, Veneranda Lemos rekoohese, nia parte informa ba publiku iha fulan Outubru 2025 katak projetu reabilitasaun estrada urnaba akontese iha fulan Novembru 2025, tanba hetan informasaun husi Governu Sentral no hanesan Autoridade Munisipiu sente kontente hodi informa ba Baukau oan tomak atu hatene, tanba projetu estrada urbana nuundar kondisaun importante neebe Baukau oan hotu hein atu lansa, maibe iha la akontese lansa fatuk dahuluk iha fulan Novembru, tanba iha fulan Novembru liu ba Governu Sentral hamutuk ho Autoridade Munisipal preokupa iha Nasional.
“Tuir planu Governu halo lansamentu iha 20 Novembru, maibe haluha tiha katak iha loron 20 Novembru sei iha nafatin diskusaun orsamentu espesialidade ke ita lahatene iha perturbasaun ho atividade sira seluk, Xefe Governu rasik aviza ba membru Governu no entidades hotu neebe iha responsabilidade atu defende Orsamentu Jeral Estadu atu labele sai ba estranjeiru halo atividade seluk, hotu hotu konsentra iha Parlamentu Nasional,” Veneranda hateten ba STL, iha nia knaar fatin Servisu Administrasaun Autoridade Munisipal Vila Nova, Baukau, Kuarta (03/12/2025).
Nia sublina, loron lansamentu fatuk dahuluk ba projetu reabilita estrada urbana Baukau Vila monu iha diskusaun espesialidade ba Orsamentu Jeral Estadu 2026, tanba nee la konsege halo lansamentu ba projetu refere, maibe hafoin diskusaun espesialidade finaliza mos kontinua la implementa, tanba Governu kontinua konsentra planu no preparasaun, ba iha komemorasaun loron Proklamasaun Unilateral Independensia Timor-Leste ba dala 50 neebe importante ba povu Timor-Leste.
Hafoin liu tiha komemorasaun loron Proklamasaun, loron hakat ona ba 29 Novembru imposivel atu halo lansamentu fatuk dahuluk ba projetu reabilita estrada urbana Baukau Vila.
“Loos duni katak hau mak divulga sai duni informasaun ida nee para atu hatete ba publiku katak ita nia esperensa la lakon no esperensa la bosok, se iha tempu badak halo lansamentu ba ita nia estrada urbanas,” Veneranda katak.
Prezidente Autoridade Munisipiu Baukau nee rekonhese, daudaun publiku kestiona no trata Autoridade Munisipiu Baukau iha media sosial ho liafuan Inan ba Baukau bosok ten, maibe projetu reabilita estrada urbana la bosok, tanba esperansa nunka bosok.
Nunee hanesan lideransa masima iha Munisipiu Baukau nafatin fiar aan katak Governu Sentral,?sei planeia halo lansamentu ba projetu reabilita estrada urbana Baukau Vila neebe Baukau oan hotu hein.
“Reabilitasaun estrada neebe ita hotu hein iha tempu badak Dezembru nia laran, hau fiar ida nee, mais ita labele sente se dala ruma la akontese ita mos bele tetu oituan talvez iha buat ruma ke importante liu ba lansamentu ida nee ke Governu prezisa tau atensaun,” Veneranda komenta.
Eis Deputada nee informa, posibilidade lansamentu fatuk dahuluk sei akontese iha fulan Dezembru 2025, maibe bainhira la akontese nafatin, dala ruma iha asuntu importante balu neebe Governu, prezisa tau atensaun no kompleta no garante sei akontese iha tinan 2026.
“Ita labele hatete Prezidente Autoridade dehan fulan ida, fulan ida nee la akontese neebe nia bosok ten, laiha buat ida hanesan lider ida neebe divulga sai informasaun ida nee hau simu ho fuan laran, maibe atu dehan karik akontese oinsa,”dehan nia.
Tanba nee husu publiku liu liu Baukau oan atu labele kondena ba servisu sira neebe Governu Sentral sei halo iha Munisipiu Baukau, maibe tau fiar hamutuk, tanba Governu sei tau atensaun ba reabilitasaun estrada urbana Baukau Vila.
Entretantu estrada urbana Baukau Vila neebe tuir planu atu reabilita hamutuk kilometru 23 kobre husi Vila Antiga too Vila Nova no kontinua too iha area Nagardjo parte Uainiki, maibe too ohin loron Autoridade Munisipiu Baukau seidauk hetan dezenhu ba projetu refere, tanba prepara husi Nasional no seidauk remata ba Autoridade Munisipiu Baukau.
Jornalista: Tomas Reis
Editora: Carme Ximenes
