DILI, STLTIMORLESTE.com – Rede Advokasia ezije ba governu atu aloka Orsamentu Jeral Estadu (OJE) ba lina Ministerial xave sira, hodi implementa lei kontra violensia domestika.
Kestaun nee hatoo husi Portavos Rede Advokasia, Natalia de Jesus liu husi konferensia imprensa neebe halao iha salaun FOKUPERS, Dili, Kinta (24/10/2024).
Nia hatete, oras nee daudaun lei violensia domestika kada loron numeru kontinua sae, tanba nee mak ejize ba iha governu atu bele aloka orsamentu ba lina Ministerial sira atu bele implementa Lei Kontra Violensia Domestika (LKVD) no Planu Asaun Nasional Violensia Bazeia ba Jeneru (PAN VBJ) 2022-2032 no halo fiskalizasaun ho rigorozu ba ninia implementasaun programa sira.
Tanba iha tempu okupasaun liu liu iha militar Indonezia nia ukun. Labele tan Feto Timor Leste no Labarik-Feto terus no mate tan Violensia husi familia rasik iha tempu Timor Leste Indepente. Tanba nee Rede Advokasia hakarak apela no ezije ba entidades no autoridade relevantes.
“Governu no Parlamentu Nasional tenki asegura alokasaun orsamentu sensivel ba jeneru iha Orsamentu Jeral Estadu iha Linas Miniteriu Xave sira, ba implementasaun Lei Kontra Violensia Domestika (LKVD) no Planu Asaun Nasional Violensia Bazeia ba Jeneru (PAN VBJ) 2022-2032, no halo fiskalizasaun ho rigorozu ba ninia implementasaun programa sira. Husu ba Orgaun Judisiáriu sira atu implementa Lei Kontra Violensia Domestika (LKVD) no lei sira seluk neebe relasiona ho aktu krime ho rigorozu no aplika duni tuir normas judisial neebe iha ona no avalia regularmente tendensia krime sira neebe julga iha tribunal no pena neebe aplika ba (kondenadu) sira. Ida-nee esensial tebes atu asegura katak sistema legal jurídiku funsiona hodi garante protesaun adekuada ba vitima sira no prevene krime seluk akontese iha futuru” katak nia.
Rede Advokasia husu ba Polísia Nasional Timor-Leste (PNTL) halo atuasaun imediata ba krime publiku tuir lei haruka no knaar PNTL nian ho severidade.Husu ba Sekretaria Estadu ba Igualidade (SEI), atu haluan no haforsa liutan sosializasaun ba Lei sira neebe liga ho Violensia Bazeia ba Jeneru (VBJ) hodi abranje ba komunidade iha territoriu tomak, ho kordenasaun besik liu tan ho sosiedade sivíl hodi muda norma sosial sira neebe kuntinua haforsa imbalansu poder no dizigualdade iha sosiedade no husu mos atu aselera revizaun Lei Kontra Violensia Domestika
Husu ba Ministeriu Xave sira nuudar implementador Lei Kontra Violensia Doméstika no Planu Asaun Nasional Violensia Bazeia ba Jeneru atu tau iha Planu Asaun Anual tinan 2025 nia ba oin iha alokasaun Orsamentu Jeral do Estadu ba dezenpena sira nia funsaun iha prevensaun no responde ba Violensia Bazeia ba Jeneru, Husu ba Provedor Direitus Humanos no Justiça (PDHJ) atu asegura implementasaun Lei liu husi monitorizasaun ba lei sira Manuais, Regulamentu sira nia implemtasaun ho efikas tuir prinsipiu DH no Boa Governasaun.
RA Husu no eziji ba Ministerio Saude atu responde ho maxima atensaun ba kazu violensia bazeia ba jeneru neebe ho kondisaun grave atu fo atendimentu mediku ho responsabilidade nudar profesional ema saude nian no haforsa liutan koordensaun no komunikasaun iha prosesu referal nian sira.
Husu ba Igreja Katalika no Konfisaun Reliojiozu sira hotu iha Timor-Leste atú haforsa liu tan formasaun ba kazál pre-matrimoniu ba komunidae em jeral túir prinsipiu no valores Relijiaun idak-idak nian, promove paz no respeita Direitus Umanus no hakribi Violensia. Ba organizasaun sosiedade sivíl hotu atu haforsa rede advokasia iha prevensaun, protesaun no prestasaun servisu iha akompañamentu ba Vitima Violensia Bazeia ba Jeneru (VBJ) iha territoriu tomak.
Ba Lideransa komunitariu sira atu garante katak komunidade sira hotu bele iha konsiensia atu prevene Violensia hasoru feto iha komunidade no hala’o kana’ar hódi responde ba Violensia Bazeia ba Jeneru (VBJ) túir lei haruka.
Sira mos Husu ba Komunidade sira hotu atu hakribi no hapara Violensia oi-oin hasoru feto no labarik feto atu halo medidas de prevensaun antes akontese no responde imediata ba Violensia domestika bainhira akontese, tamba Violensia Doméstika konsidera nuudar Krime Publiku. Se deit mak hare no rona Violensia Domestika akontese iha uma ka iha fatin publiku sira hatoo kedas keixa ba polísia atu tulun vítima.
Nunee mos membru advokasia Inocencio Xavier hatete lei iha ona maibe fraku iha nia implementasaun no ajente estadu ruma mos ladun intende didiak konaba lei violensia domestika.
“Ema hanoin katak violensia domestika nee hanesan bikan kanuru mak tarutu tanba nee mak sei nafatin hein too ema mate mak foin hakfodak, hanesan mos kazu bekora dala barak akontese vijino sira rona sira la brani keixa tanba dehan nee bikan kanuru mak tarutu maibe tuir lei violensia domestika se deit mak haree bele keixa,” katak nia.
Nunee mos Diretora Fokupers Domingas Afonso Amaral lei kontra violensia domestika nee iha ona maibe iha nia implementasaun mak sei menus, alende nia mos husu Governu atu bele tau orsamentu neebe mak masimu ba iha lina ministerial sira hodi bele haree konaba feto no labarik feto. “Presiza aloka orsamentu neebe mak masimu ba iha Lina ministerial save sira hodi bele hareefeto no labarik deto sira liu liu ba iha violensia kontra feto no labarik feto,” katak nia.
(eme)
