DILI, STLTIMORLESTE.com – Rede Advokasia Luta ba Direitu Feto no Labarik Feto kondena makaas hahalok laen ho inisia JRX, oho feen gravida Brta Soares neebe akontese iha Suku Bekora foin lalais.
Rede Advokasia neebe mak kompostu husi entidade oin oin hanesan Fokupers, Alfela, JSMP, Y.Hak, Pradet, Rede Feto Timor Leste fundasaun Rorum Komunikasaun, Casa Vida, Uma Mahon Salele, Fupas, Uma Pas Oecusse, no seluk tan kondena makaas ba hahalok husi mane neebe mak ho naran inisial JRX neebe mak halo agresaun fiziku hasoru feen ho kondisaun gravida ikus halakon vida. Tanba nee mak Rede Advokasia husu nafatin tribunal atu kondena mane ho pena tuir lei neebe mak vigora.
Petavos Rede Advokasia, Natalia de Jesus hanesan, Portavos Rede Advokasia hatete, esforsu barak maka Organizasaun Sosiedade sivil hamutuk ho Governu no Ajensia Internasional sira halo, hodi luta kontra violensia hasoru Feto no Labarik Feto sira iha Nasaun Demokatiku Timor-Leste, maibe violensia hasoru Feto no Labarik Feto kontinua aas too halakon Feto no Labarik inosente sira nia vida.
Iha ambitu komemora loron Internasional Labarik Feto neebe monu iha data 11 Outubru 2024 no mos loron Internasional Feto Rural iha data 15 Outubru 2024, mundu tomak selebra inklui Timor Leste nudar loron importante sira hodi asegura Labarik no Feto Rural sira nia direitu neebe konsagra iha Konstituisaun RDTL.
Tanba nee Rede Advokasia hakarak hatoo no bolu dala ida tan ba publiku hodi kondena hahalok Violensia sira hasoru feto no labarik-feto neebe akontese iha moris família, komunidade no sosiedade, tanba sira-nia vulnerabilidade no estatutu neebe kbiit laek. Laos deit violensia hasoru feto no labarik feto maibe Feminisida akontese tan iha Timor-Leste Independente no Demokratiku,” katak nia.
“Akontensimentu iha loron 20 Outubru 2024 iha Bekora iha oras madrugada. Vitima inisial B. C estado isin rua fulan 8 tenki lakon nia vida ho deit poder no agresivu husi suspeitu ho razaun deskonfia. Hahalok krime nee labele tolera no laiha razaun seluk atu suspeitu halokon nia kaben no oan nia vida. Surpreza liu bebe neebe inocente los tenki mos simu aktu violensia husi suspeitu. Vitima nudar feto ida neebe kalan loron buka osan ka halo negosiu fan roupa no sepatu iha mercado Taibessi hodi sustenta nia familia,” dehan Natalia.
Portavos nee haktuir, akontesimentu iha Irlandia iha loron 14 Outubru 2024, lori notisia triste tebes mai iha Timor-Leste liu-liu ba inan sira, inan ho amam lolos sai fatin neebe hakmatek, fatin seguransa, fatin domin, maibe tamba deit orgullo no interese inan amam nian tenki baku baku mate oan neebe inocente los la hatene hahalok mundo no familia nian.
Iha oportuniddae ida nee hakarak agradese tebes ba Governo Irlandia, Autores Judisiarios sira neebe emidiatamente foti asaun investigasaun klean ba kazu nee hodi hatudu sira nia solidariedade hamrik iha vitima no komuniddae timorense hodi fo sira nia poiu tomak atu vitima hetan justisa. Agradese mos ba komunidade Irlandia no Komunidade Timorense tomak iha neeba hodi fo sentidus de amizade karinhu ba Alin kiik inocente nee.
Hahalok violensia sira neebe feto adultu barak tenki simu husi sira nia parseiru moris no labarik-feto hetan husi familia rasik neebe lolos tenki proteje maibe agresaun violentu sira, estraga too hakotu sira nia vida. Uma no familia nuudar fatin hafahe domin no hatudu inisiu respeita malu nian, sai tiha faitn fuik no laiha konfiansa no domin.
Nunee mos Membru Rede Advokasia, Inocencio Xavier hatutan, kazu nee akontese ona iha prosesu ida nia laran tanba nee rede advokasia husi Tribunal nia desizaun tenke justu.“Ita nia hanoin katak tribunal nia desizaun nee justu ba aktu neebe mane nee halo tanba nia hamete inan no labarik, tanba nee mak tribunal ho posizaun ida neebe klaru no justu iha desizaun hotu no tenke iha desizaun neebe mak forte hasoru laos deit ba arguido neebe mak agora dadaun tama maibe efetu ba ema seluk karik halo asaun ba feto no labarik seluk,” katak Membru Rede Advokasia nee
Nunee mos Diretora Fokupers, Domingas Afonso Amaral dehan, kada loron violensia kontinua numeru sae nee tuir peskiza Fokupers neebe iha haree katak, lei nebee mak mak sei fraku.
“Tuir ita nia haree katak lei balun mak sei fraku ou forte didiak, tanba nee mak agora dadaun iha dadaun faze revizaun lei kontra violensia domestika no ita iha esforsu makaas, atu oinsa bele iha kondenasaun neebe mak ho seriedade liu liu kazu violensia domestika nia,” katak nia.
(eme)
