DILI, STLTIMORLESTE.com – Bainhira Rede Feto Timor Leste realiza konferensia iha Munisipu identifika problema lubuk ida mak feto ho ema ho defisiensia inklui estudante sira hasoru, iha area remotas liga ho assuntu politika fila hikas ba eskola, infraestrutura eskola no seluk tan.
Kestaun nee hatoo husi Prezidente Konselhu Diretoria Rede Feto Timor Leste, Zelia Fernandes ba STL iha nia knaar fatin Kaikoli, Segunda (28/10/2024).
“Hanoin konferensia Feto munisipal nia ita halo ona iha munisipiu 5 iha Baukau, Vikeke, Kovalima, Ainaro no Manufahi, munisipiu 5 neebe liu ita iha grupu diskusaun ba haree tematiku 8 neebe iha ho idak-idak nia deskobrementu neebe mak iha,” dehan Zelia.
Nia dehan, antes halo diskusaun tematiku 8 nee sira mos aprezenta fila fali rezultadu plataforma neebe uluk submete tiha ona ba Governu tinan 4 liu ba kotuk, no aprezenta fila fali hodi kontinua rona kongresista sira nia hanoin kona-ba saida mak inklui ona, ida neebe mak presiza halo diak liu tan, hodi rona fali hanesan tipu de validasaun ba iha rezultadu sira nee no saida mak seidauk halo no implementa ou atinji kontinua promove iha area tematiku ida agora, para depois ikus lori mai kongresu nasional hamutuk ho munisipiu hotu-hotu hodi re-prioritiza fila fali asuntu sira nee hodi elabora iha Plataforma de asaun feto da 6 nian.
“Iha kada area tematiku neebe kontinua sai kestaun ba ita porzemplu iha feto no justisa barak liu mos koalia konaba justisa violensia bazeia ba jeneru mak dala barak tarde la prosesa distansia entre hela fatin husi vitima sira nia hodi asesu ba justisa formal neebe mak dook ezemplu balun iha Manufahi tenke ba tuir julgamentu iha Kovalima, balun hela iha Uatucarbau, Uatulari tuir julgamentu iha Baukau, entaun dala barak difikulta sira se bainhira laiha asistensia mai husi Ministeriu Solidaridade sosia latu fasilita transporte no han nia para sira mai, no dala barak nee difisil liu mak asesu ba transporte neebe mak seguru para lori sira ba iha julgamentu sira nee,” hatete nia.
Nunee mos assuntu seluk tan neebe mak deskobre mak area edukasaun nian barak mak kontinua tau kestaun mak konaba infraestrutura neebe aat ezemplu edefisiu eskola neebe kondisaun aat sala de aula menus, profesores menus, no konstrusaun imfraestrutura neebe mak la asesivel mezmu ema ho defisiensia hakarak asesu maibe eskola laiha rampa atu fasilita estudante ema ho defisiensia atu asesu.
Nunee mos kestaun seluk mak politika fila hikas ba eskola neebe lolos sai rekomendasaun dezde segundu kongresu ate kintu kongresu ninia too ohin loron seidauk iha no kongresista sira kontinua ezije atu iha politika fila hikas ba eskola hodi kontibui ba redusaun total bele fasilita joven sira neebe kaben sedu atu hetan diploma asesu ba iha universidade.
Prezidente Rede Feto hatete, programa ekivalensia neebe durante nee la funsiona ho diak iha nivel munisipal sira ida nee sai mos kestaun, tanba nee RFTL tau mos ezijensia katak se bele funsiona fali programa nee no bele hahu dezenvolve ona programa ekivalensia ba ensinu sekundariu, agora dadaun iha mak programa ekivalensia ensinu baziku entau sai mos preokupasaun balun neebe mai husi kongresista husi munisipiu sira.
“Iha area sira neebe mak hanesan saude nia sira mos kontinua preokupa konaba laiha pesoal saude sira neebe mak bele fo atedementu mediku no menus aimorok ida nee kontinua sai ezijensia sai preokupasaun ida husi kongresista sira neebe deskute mos iha konferensia munisipal sira, espesialista mediku sira falta tebes iha munisipiu sira ida nee mos sai preokupasaun ida sei elabora bai ha rekomendasaun neebe lubuk ida ona,” katak Zelia.
(eme)
