BAUKAU, STLTIMORLESTE.com – Rede internet neebe instala iha edifisiu Balkaun Uniku Baukau falha, tanba nee funsionariu sira utiliza hotspot telefone ba komputador hafoin halao servisu.
Diretor Diresaun Munisipal Konservatoria Servisu Rejistu Notariadu (DMCSRN – sigla português) Munisipiu Baukau, Justina das Neves Mendonça hateten, atendimentu iha Balkaun Uniku Baukau funsiona ona hafoin Ministeiru Administrasaun Estatal inaugura, atendimentu ba publiku kuaze lao, maibe linha internet iha edifisiu refere lao la efetivu.
“Ita estabelese ona Balkaun Uniku, maibe atendimentu semana ida deit, tanba asesoria laiha, aleinde asesoria ita nia Balkaun Uniku susar atu asesu linha internet, entaun semana ida sira imprime uza hotspot,” hateten Justina ba jornalista STL iha knaar fatin Vila Nova Baukau, Segunda (02/06/2025).
Tuir Diretora nee katak, utiliza Hostpot halao servisu hafoin halo atendimentu impreme Bilhete Identidade orijinal ba sidadaun sira, difikulta servisu, tanba loron ida labele atende too nain 30, nunee daudaun atendimentu iha Balkaun Uniku Baukau paradu.
Hatan ba kestaun nee, Koordenador Balkaun Uniku Baukau, Euclides Ornai rekonhese, situasuan refere Balkaun Uniku Baukau hasoru, maibe nuudar meius ba segundu opsaun hodi hatan ba nesesidade bainhira linha internet la lao, maibe durante atendimentu iha Balkaun Uniku Baukau la lao, tanba Server neebe instaladu la simu sistema.
“Utiliza Hostpot nee hanesan opsaun deit, ita iha server no internet neebe mak instala iha nee, maibe problema nee mak sistema la simu server TIC neebe instala iha nee,” katak Euclides.
Koordenador nee katak, atu solusiona preokupasaun refere hodi atendimentu lao hikas, mak Diresaun Munisipal Konservatoria Servisu Rejistu Notariadu (DMCSRN – sigla português) Munisipiu Baukau liu husi Ministeriu Justisa neebe nain ba sistema no TIC Timor nain ba internet iha edifisiu Balkaun Uniku tenke foti inisiativa hodi solusiona.
Tanba ezistensia Balkaun Uniku halo deit akompanhamentu liu husi oferese fatin ba parte rua atu estabelese ekipamentus hodi funsiona ba atendimentu publiku.
Nia argumentu, preokupasaun refere parte Balkaun Uniku hatoo ona ba parte rua, maibe seidauk iha solusaun.
(tom)
