BAUKAU, STLTIMORLESTE.com – Rede internet husi operador telekomunikasaun telemor iha Suku Laisorulai de Cima, Postu Administrativu Matebian, difikulta prosesa dadus suku ba munisipiu liu husi online.
Sekretaria Suku Laisorulai de Cima, Adelina Xavier Soares Tilman hateten, hafoin Ministeriu Administrasaun Estatal apoiu ekipamentus eletroniku hanesan komputador ba kada Suku iha territoriu nasional inklui Suku Laisorulai de Cima, la kleur Ministeriu mos oriente ekipa tekniku sira halo instalasaun rede internet husi operador telekomunikasaun telemor iha Suku refere, ba objetivu atu ajuda servisu Administrasaun Suku nian liu-liu prosesu dadus Siksa ba nivel Munisipiu no Nasional liu husi online, maibe rede internet neebe instaladu la fasilita servisu envia dadus Siksa husi Servisu Administrasaun Suku Laisorulai de Cima ba Munisipiu no ba Nasional, tanba prosesu lentu.
“Agora dadus hotu-hotu neebe ami submete ba iha Munisipiu no Nasional tenke liu husi internet deit, dala ruma ami prienxe Siksa nee loron ida Xefe Familia ida ami la konsege, tanba rede la diak buat nee putar putar deit entaun dala ruma mate mesak tiha deit, too agora ami nia dadus tama iha Munisipiu atrazadu,” hateten Adelina ba jornalista sira iha Laisorulai de Cima, Kuarta (16/07/2025).
Sekretaria Suku nee sublina, mezmu kliente husi operador telekomunikasaun telemor bele utiliza Sim Card telemor halo kontaktu liu husi telemovel, maibe utiliza ba internet halao servisu Suku la efetivu, tanba nee kona-ba submete dadus populasaun Suku Laisorulai de Cima nian liu husi online ba Munisipiu no Nasional seidauk atinji no kompara submete dadus tarde liu kompara ho suku seluk.
Tanba nee husu operador telekomunikasaun telemor hadia rede internet iha Suku Laisorulai de Cima liu-liu iha areadores Suku nian, nunee bele fasilita servisu Administrasaun Suku iha prosesu envia dadus Suku ba Munisipiu liu husi online.
Entretantu Suku Laisorulai de Cima rejistu total populasaun hamutuk 1.400, husi Xefe Familia 343 iha Aldeia Batikasa, Uaidaba no Uataliu.
(tom)
