DILI, STLTIMORLESTE.com – Jurista Timor oan konsidera katak, halo redusaun ba kazu pendente iha Tribunal sira presiza aumenta numeru rekursu umanus.
“Hau hanoin atu redus kazu pendente sira tenke aumenta numeru rekursu umanus, tanba rekursu umanus iha ona bele jere atu kaer prosesu sira neebe iha,” dehan Jurista Jose Maria Guterres ba jornalista sira iha Kaikoli, Sesta (20/06/2025).
Nia hatutan, prosesu barak kontinua tama iha Tribunal, no Tribunal sira kada loron halao julgamentu ba prosesu sira nee.
Sublina, ita nia komunidade sira iha ona konhesimentu kona-ba lei, tanba nee sira hasoru problema sira mos barani hatoo keixa, ida nee hatudu katak kada loron prosesu kontinua tama. Tanba nee, oinsa mak numeru autores judisial sira sufisiente atu julga prosesu sira nee no labele husik pendente kleur iha Tribunal.
Reforsa, Sentru Formasaun Juridiku no Judisiariu tenke iha planu neebe diak, atu nunee kontinua loke formasaun ba formados sira iha Sentru Formasaun atu bele prienxe ba iha servisu Tribunal nian.
Iha fatin ketak, Akademiku Universidade Nasional Timor Lorosae (UNTL), Rafael de Jesus dehan, ohin loron universidade sira produs ona finalista barak iha area direitu nian, tanba nee prepara sira nee hodi ba prienxe iha kareira autor judisiariu nian.
“Finalista sira neebe remata ona estudu bele prepara sira liu husi sentru formasaun, maibe tenke prienxe regra neebe iha atu remata husi formasaun bele ho kapasidade ida neebe diak atu halao servisu,” dehan nia.
Reforsa, finalista sira neebe remata ona estudu tenke prepara aan atu kompete iha formasaun sira bele liu hodi prienxe ba iha kareira neebe iha.
(ter)
