DILI, STLTIMORLESTE.com – Atu redus krimi Violensia Domestika iha rai laran, Governu presiza kria kampu trabalhu ba ema balu neebe seidauk hetan servisu.
“Violensia nee akontese iha familia laos tanba deit teknolojia neebe utiliza, maibe bele mai mos husi ekonomia familia uma laran,” dehan Jurista Jose Maria Guterres ba STL iha Kaikoli, Dili, Tersa (14/01/2025).
Nia hatutan, kuandu iha familia ida ekonomia uma laran la sufisiente, bele kauza moris la hakmatek iha familia, no ikus mai bele hamosu violensia iha uma laran. Tanba situasaun real agora iha familia balu neebe harii uma kain, maske sira iha oan maibe ekonomia dala ruma ba sira seidauk sufisiente.
Maibe violensia domestika nebee akontese kazu sira neebe tama iha Tribunal ho nia motivu oin-oin, maibe ekonomia mos sai hanesan faze ida kuandu la iha osan bele hamosu violensia.
Iha fatin ketak, Akdemiku UNTL, Rafael de Jesus dehan, atu redus krimi nee fila ba iha ema idak-idak nia konsiensia atu kontrola sira nia emosaun.
“Atu redus ema idak-idak kontrola nia emosaun, banhira iha nervozu nia laran, atu nunee labele akontese violensia iha familia uma laran,” dehan nia.
(ter)
