DILI, STLTIMORLESTE.com – Relasiona ho Prezidente Republika Jose Ramos Horta husu Governu redus osan viajen ba estranjeiru ba Membru Governu sira, Primeiru Ministru Kay Rala Xanana Gusmão hatete, depois sei fo relatoriu ida.
Liafuan nee Primeiru Ministru Kay Rala Xanana Gusmao hatete ba Jornalista bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolao Lobato, Bairo Pite, Kinta (04/09/2025).
Nia hatete, liga ho deklarasaun husi Prezidente Republika neebe husu atu redus osan viajen ba membru Governu, PM sei fo relatoriu ida. Agora haree laiba ba iha Association of Southeast Asian Nations (ASEAN), tanba sei barak liu fali.
“Viajen ba estranjeiru hau depois fo relatoriu ida, ba ASEAN barak liu fali. Loron ida iha nee ka iha laran neeba, Prezidente bolu Embaixador Jakarta nia mai hotu iha nee Prezidente koalia katak, ami sei tama ASEAN buat sira nee hotu, hotu tiha hein ba bolu han Prezidente dehan Primeiru Ministru koalia oituan hau dehan lae. Hau mai laos atu koalia maibe hau mai partisipa, maibe Prezidente dehan lae koalia oituan konaba ASEAN hau dehan deskulpa, derepente deit hau dehan Prezidente koalia tiha konaba ASEAN, agora atu informa ba ita boot sira katak bainhira tama ASEAN hau sei forma Governu rua, ida ba reuniaun iha ASEAN ida serbisu ho hau iha rai laran, sei iha 150 reuniaun kada tinan,” katak Xanana.
Nia hatete, neebe kuandu bainhira tama ASEAN, bele evita ona, tanba ida seluk hakarak tama.
Xefe Governu dehan, dezenvolve Timor Leste sai ba liur, maibe Primeiru Ministru hatoo ba embaixador sira katak bainhira TL tama ASEAN PM sei forma Governu rua, ida reuniaun ASEAN nia no ida servisu ho Primeiru Ministru iha TL.
Antes nee Prezidente Republika Jose Ramos Horta husu atu redus orsamentu viajen ba rai liur
“Hau hanoin osan viajen ba membru governu sira nian nee tenke redus, redus ba hotu-hotu, loloos ba kada ministru, la devia viazen maximu tinan ida dala rua ba liu. Bele lori masimu ema nain rua, tolu, depois lalika hotu-hotu hakarak ba bisnis klasse. Hau nia vida tinan 20 resin viajen iha mundu nee ekonomia klasse,” katak Horta.
Prezidente Republika hatete, realidade governu sai gabinete tomak sai hotu, maibe Prezidente Republika, Premiu Nobel da Pas nia delegasaun haat too lima. Klaru lori jornalista nee ketak la kahor ho delegasaun, Prezidensia Republika mak selu, tenke lori duni jornalista sira atu fo informasaun ba publiku nee diak, pozitivu.
Jornalista: Emerenciana Pinto
Editora: Domingas Gomes
