DILI, STLTIMORLESTE.com – Sekretariu Estadu Komunikasaun Sosial (SEKOMS), Expedito Dias Ximenes hatete, durante nee Governu la tau publisidade ba jornal STL, Timor Post, Independente no Dili Post, tanba redusaun orsamentu, maibe ho preokupasaun neebe media 4 hatoo, nia sei hatoo iha Konselhu Ministru.
Expedito Dias Ximenes haktuir ba jornalista sira iha Palasiu Prezidensial Nicolau Lobato, Bairo Pite, Kinta (23/10/2025).
Nia hatete, nia sei hatoo preokupasaun neebe media 4 hasoru nee ba iha Konselhu Ministru.
“La tau publisidade ba jornal 4 nee hetan tanba redusaun orsamentu. Redusaun orsamentu husi tinan ba tinan, entaun ministeriu sira la tau ona publisidade hanesan uluk. Ida nee efeitu tanba dala barak ho avansu teknolojia neebe publikasaun dala barak dijitalizasaun, entaun ministeriu idak-idak dala barak tau iha nia pajina ministeriu nian, maibe ho preokupasaun ida nee hau sei hatoo iha Konselhu Ministru, nunee karik iha relasaun publiku ho media oficer neebe iha ministeriu sira atu bele fo atensaun ba iha publisidade sira neebe uluk halo iha jornal sira,” dehan nia.
Nia hatete, sei hatoo iha Konselhu Ministru, nunee karik orsamentu tau iha relasaun publika iha ministeriu sira, entaun bele tau atensaun liu husi publisidade ba jornal sira neebe oras nee sente preokupadu no menus ho publisidade iha jornal 4 nia laran.
Jornalista: Emerenciana Pinto
Editora : Domingas Gomes
