DILI, STLTIMORLESTE.com – Timor Leste (TL) sorte iha lider barani ida ho naran Kay Rala Xanana Gusmão neebe ho aten barani hodi deside loron referendum 30 Agostu 1999, iha tempu neebe difisil nia laran.
Liafuan nee haktuir husi Prezidente Republika Jose Ramos Horta ba Jornalista bainhira fila hikas mai Timor Leste iha Aeroporto Internasional Nikolao Lobato, Komoro, Sesta (29/08/2025).
Nia hatete, loron ida tan selebra 30 Agosto, hanesan foin lalais selebra 20 Agosto. Loron 30 Agosto, importante tebes, realizasaun referendum momentu neeba difisil los.
“Hau hatete dala barak iha mundu, iha neeba hatete fila fali ba populasaun ita sorte iha lider ida hanesan maun Xanana, tanba nia mak kaer negosiasaun ho ONU ho Indonezia ho Portugal para organiza resensiamentu konsulta popular nee, tanba nia matenek ran malirin apejar ke ameasa oin oin, violensia iha momentu neeba maibe nia hatete ba oin nafatin referendum tenke halo 30 Agosto,” katak nia.
Nia dehan, iha tempu neebe difisil maibe Lider Karismatiko Xanana Gusmao ho fuan malirin matenek nafatin firme iha nia desizaun katak realiza referendum tenke halao iha loron 30 fulan Agosto 1999.
“Tanba momentu neeba ONU rasik hakarak adia ba tempu seluk Portugal hakarak adia, Bispo Belo mos hatete, maibe Xanana hatete ba oin, se iha momentu neeba iha lider fraku tauk, entau referendum adia entau bele akontese hanesan Sahara nia,” katak Prezidente Republika.
Xefe Estadu hatete, iha loron importante nee Prezidente sempre hanoin hetan lider Xanana Gusmao nia lideransa, ba Falintil sira no rejistensia tomak rona Xanana nia orden.
Jornalista: Emerenciana Pinto
Editora: Domingas Gomes
