DILI, STLTIMORLESTE.com – Atu dezenvolve agrikultura iha Timor Leste (TL) presiza reforsa kreatividade ema agrikultor sira, nunee bele investe no dezenvolve diak setor agrikultura iha rai laran.
“Ita koalia kona-ba dezenvolvimentu setor agrikultura iha TL, presiza prioritiza kreatividade agrikultor sira nian, tanba husi sira nia kreatividade bele halo produsaun no halo investimentu diak ba setor agrikultura nian,” dehan Estudante Universidade Nasional Timor Lorosa’e (UNTL), area agrikultura, nuudar peskizador iha setor agrikultura, Amansio Auneto das Dores ba STL iha nia knaar fatin, Kaikoli, Dili, Tersa (04/02/2025).
Nia dehan, setor agrikultura nee sai baze importante ida ba ema hotu, tanba husi setor ida nee bele kria kampu trabalhu ba ema agrikultor sira atu iha kreatividade hodi produs produsaun sira iha rai laran, hanesan halo natar, kuda haree, halo toos kuda batar, fore, koto, no produtu lokal sira seluk, nunee hasae produsaun rai laran.
Tanba Timor Leste sai membru Association of Southeast Asian Nations (ASEAN) presiza iha dezenvolvimentu diak ba setor agrikultura nian, hasae numeru produtu lokal rai laran, atu bele iha politika oinsa halo esportasaun produtu lokal ba nasaun seluk atu konsumu hanesan TL konsumu mos produtu importasaun sira.
Aleinde nee Visi Diretor Asosiasaun HAK, Antonino de Limas katak, durante Timor Leste ukun aan, kona-ba dezenvolve infraestrutura, liu-liu setor agrikultura seidauk iha mudansa, nunee presiza tau prioridade neebe lo-loos, oinsa investe setor refere ho diak, nunee futuru setor nee bele sai dezenvolvidu liu tan.
Entretantu Peskizador AJAR, Inocencio de Jesus Xavier hatete, Governu presiza dezenvolve setor agrikultura, tanba setor nee mak sei substitui ba fundu minarai bainhira maran.
(EST 1)
