DILI, STLTIMORLESTE.com – Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu ho Komisaun Ezekutiva Zona Ekonomika Espesial ba Dezenvolvimentu Oecusse-Ambeno (KE-ZEEDOA), Hercolanu de Sousa, relata progresu servisu ba Primeiru Ministru (PM), Kay Rala Xanana Gusmão, hafoin simu knaar fulan ida iha Oecusse.
Tuir Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu ba jornalista sira iha Palasiu Governu, Segunda (07/10/2025), ohin Autoridade RAEOA ho KE-ZEEDOA mai hasoru PM Xanana hodi informa kona ba progresu serbisu iha Oecusse durante fulan ida.
“Ohin ami Autoridade RAEOA ho KE-ZEEDOA mai hasoru PM Kay Rala Xanana Gusmao, atu kontinua fo konfiansa formal liu tan, ba Oecusse oan, atu mos fo hanoin kona ba saida maka fundamentu estadu, saida maka objetivu global ba ita nia povu iha rai enclave, entaun ami komesa simu knaar iha loron 1 de Setembru 2025 no iha loron 30 de Setembru ami halao ami nia knaar durante fulan ida halao knaar, ho orientasaun klaru, bazeia ba rezolusaun nomos bazeia ba responsabilidade obrigasaun moral, Nai PM ba ita nia povu tomak. Ohin ami mai informa, saida maka ami sei halo too 31 de Dezembru 2025, remata ami nia serbisu durante fulan 3 nee. Ohin mos ami relata, saida maka ami konsege halo ona iha aktus administrativas, aktus obrigatoriu institusional estruktural funsional, neebe ke kabe ba obrigasaun governu ba estrutura foun PA-RAEOA ho membrus sira neebe ke lao hela,” dehan PA-RAEOA, Regio da Cruz Salu ba Jornalisa sira iha Palasiu Governu hafoin halao enkontru ho PM Xanana, Segunda (06/10/2025).
Nia haktuir tan katak, PA-RAEOA ho KE-ZEEDOA assume knaar ho mandatu fulan 3 nee, halo para labele toba.
“Ba ami simu knaar PA-RAEOA ho KE-ZEEDOA assume knaar ho mandatu fulan 3 nee, halo ita para labele toba, maibe serbisu ba povu no serbisu ba governu nee, ohin ita tuur deit iha aihun mos ita serbisu nafatin. Ami ohin informa ba PM Xanana katak, ami lao ona ho orientasaun, ita nia povu iha Oecusse, iha animu neebe ke diak, tanba sira hakarak atu riset fali serbisu administrasaun, prestasaun serbisu institusional neebe besik liu ba povu. Ami mos informa ba PM Xanana hodi fo obrigado barak ba serbisu interministerial, neebe ke ba ajuda ami iha riset, isu institusional, structural, funsional importante, atu lalais serbisu hakbesik lalais ba povu, sira neebe presiza lalais bee, lalika hein PA-RAEOA asina tiha lai, depois maka hein desizaun atu lori bee lalais ba povu sira nee akontese, ida nee lae, ida nee hanesan obrigasaun ida, tantu laos deit kotu iha ami nain rua nia liman, PA-RAEOA ho KE-ZEEDOA, maibe momentum ida ke ita tenke ezersa obrigasaun governu, ba rai Oecusse hodi kontinua ho modelu ida neebe ke responsavel no serbisu iha povu nia oin,” afirma nia.
Iha biban nee, nia husu ba Oecusse oan sira atu kontinua iha pensamentu kritiku, atu akompanhia prosesu estadu foun atu halo Oecusse hanesan rejiaun Administrativa Espesial no zona ekonomika espesial ida neebe ke atraidu, rezilenti ho povu Oecusse nia imajen reprezenta povu iha nasaun TL nia diak ba ema hotu-hotu.
PA-RAEOA: Hau La Rekruta Tan Funsionariu Foun Iha RAEOA
Prezidente Autoridade RAEOA Regio da Cruz Salu hatete, autoridade RAEOA foun nee la rekreta tan funsionariu foun iha Oecusse-Ambenu, Autoridade RAEOA kontinua manten funsionariu autoridade anterior nian.
“Hau la rekruta tan funsionariu foun, ami mantein funsionariu autoridade anterior nian, atu bele servisu hamutuk ho ami, bele lori dezenvolvimentu ba povu nia leet” hatete Prezidente Autoridade RAEOA Regio da Cruz Salu iha Palasio Governu Dili, Segunda (06/10/2025).
Lider masimu RAEOA nee hatutan, autoridade sesante nee, hatama funsionariu barak liu hamutuk 400 ital, maibe autoridade ida agora nee hamenus too 100 ital, unidade balun autoridade RAEOA desmantela tiha, tanba la presiza iha GPA nia okos.
“Salariu nee, ami aplika tuir tabele funsaun publiku nian, atu nunee too tempu ami sai karik, sira bele kontinua servisu, ami harii unidade ida ho nesesariu duni, servisu kona ba protesaun direitu labarik nomos feto, funsionariu balun ita koloka ba iha neeba” afirma PA RAEOA.
Tuir informasaun neebe jornalista STL asesu iha Gabinete Prezidente Autoridade RAEOA, Autoridade Foun RAEOA, dadaun nee kontratu tan funsionariu foun nain 80 iha gabinete Prezidente Autoridade RAEOA, kompostu husi asesor Internasional nain 5 no asesor nasional nain 8.
Jornalista: Joseph Koa
Editor: Joseph Koa
