DILI, STLTIMORLESTE.com – Reitor Universidade Nasional Timor Lorosa’e (UNTL) hamutuk ho dirijente nain haat (4) submete ona mai iha Tribunal Judisial Primera Instansia Dili (TJPID) hodi tuir prosesu Primeiru Interogatoriu (PI).
Prosesu nee iha arguidu nain neen, maibe iha arguidu nain lima maka submete mai iha Tribunal, no arguida LSdA la mai tanba baixa hela iha Hospital Nasional Guidu Valdadares (HNGV).
Prosesu Primeiru interogatoriu nee taka ba iha publiku, maibe husi parte Ministeriu Publiku (MP).promove krime haat ba iha arguidu sira, mak hanesan krime Administrasaun Danoza, krime Pekulatu de uzu, krime Falsifikasaun Dokumentus no krime Abuju Poder.
Tuir regra neebe iha, iha prosesu primeiru interogatoriu banhira rona hotu ona arguidu sira nia deklarasaun mak foin tama ba iha faze alegasaun husi parte Ministeriu Publiku no mos Defeza sira, remata husi nee mak foin tama ba iha despaisu ikus, atu Juiz turnu deside kona-ba medida saida mak sei aplika ba arguidu sira.
Tuir observasaun STL nian, arguidu sira too iha Tribunal maizumenus oras tuku 16 liu minutu balu, akompanha husi autoridade seguransa no hatais faru detidu.
Liu tiha minutu balu, arguidu sira tama kedan ba iha sala julgamentu prinsipal, hodi tuir prosesu primeiru interogatoriu.
No observa mos katak, Tribunal Dili iha familia no kolega husi arguidu sira nian, kontinua iha Tribunal hodi akompanha prosesu nee. Tanba nee oras nee daudaun prosesu primeiru interogatoriu lao hela.
Prosesu nee prezide husi Juiz turnu Arjentino Nunes, Ministeriu Publiku reprezenta husi Prokurador Matias Soraes no Prokurador estajiadu nain ida Juvensio Amaral, no arguidu nain lima hetan asistensia legal husi Advogadu Privadu no Defensor Publiku.
Rekorda katak Polisia Nasional Timor-Leste (PNTL) liu husi Diresaun Servisu Investigasaun Kriminal Nasional ezekuta mandadu Tribunal Judisial Primeira Instansia Dili (TJPID) ho NUC 086/25-PNSIK hodi halo buska, apreensaun no detensaun ba Reitór Universidade Nasionál Timor Lorosa’e (UNTL) João Soares Martins no dirijente nain lima.
Diresaun Servisu Investigasaun Kriminal Nasional ezekuta mandadu Judisiál hodi halo buska, apreensaun no detensaun nee, relasiona ho violasaun balu neebe akontese iha tinan 2024.
(ter)
