DILI, STLTIMORLESTE.com – Reitor Instituto Superior Cristal (ISC) Dr. Sebastiao Pereira husu ba estudante estajiariu sira neebe halao atividade eskola nian iha neebe deit tenke kumpri regulamentu neebe instituisaun fo sai antes halao estajiu.
Reitor ISC, Sebastiao Pereira hato’o kestaun nee relasiona ho estudante estajiaria sira husi ISC neebe hetan asidente ho kareta mikrolete marka Cheguevara iha area Abolir Matebian Hun, Suku Abo, Postu Administrativu Matebian, Munisipiu Baukau, Sesta (12/9/2025).
Nia dehan, asidente nee rezulta estudante estajiaria nain 12 kanek no husi total nee, ema nain ualu (8) kanek kman no ema nain hat (4) kanek todan.
“Tuir informasaun neebe ami simu husi Kampus ISC Baukau katak husi vitima nain 12 nee, ema nain 8 alta tiha ona no fila-fali ba kampus no ema nain 4 mak sei iha Hospital HoREX Baukau tanba kanek todan,” dehan Reitor Sebastiao Pereira ba STL iha Dili, Sabadu (13/9/2025).
Tuir Reitor Sebastiao Pereira, estajiaria sira neebe hetan asidente iha area Matebian hun nee husi ISC Sentral Dili area estudu parteira nian neebe daudaun halao estajiu iha HoREX Baukau ba area estajia Klinika Bazika no estajia ba area espesialidade nian.
“Estajiaria sira nee barak mak fila ona Dili, tanba duransaun estajiu nee fulan 3 no fulan 4 deit. Lolos nee la bele akontese ida nee, tanba kampus iha regra neebe bandu estudante atu halo atividade seluk. Tanba nee, ami husu ba estajiaria sira neebe halao atividade kampus nian iha fatin ida tenke kumpri regulamentu neebe iha,” katak Reitor Sebastiao Pereira.
Nunee mos Prezidente Executivu Fundasaun Cristal, Dr. Agostinho Dos Santos Goncalves, hatete katak loos duni akontesementu dezastre ida iha Matebian hun neebe rezulta estudante estajiaria husi ISC Sentral Dili hetan kanek.
“Hau simu ona informasaun nee, maibe atu klaru liu kona ba akontesementu nee, ita boot konfirma ba Reitor ISC,” katak Agostinho.
Antes nee, dosente ISC Polo Baukau, Leopoldo Moreira Belo esplika, estudante estajiaria neebe hetan asidente iha area Matebian Hun husi ISC Sentral Dili area estudu parteira nian neebe daudaun halao estajiu iha HoREX Baukau ba area estajia Klinika Bazika no estajia ba area espesialidade nian, maibe too hetan asidente iha area matebian hun.
“Lo-loos nee labele akontese ida nee, tanba kampus iha regra neebe bandu estudante atu halo atividade seluk, derepente kalan ami rona estudante hirak nee dehan mikrolete ida naran Cheguevara tula sira ba neeba hetan dezastre,” hateten Leopoldo ba jornalista sira iha resintu sala emerjensia HoREX Baukau, Sesta (12/09/2025).
Nia sublina, estudante estajiaria hirak neebe infrenta asidente refere iha matebian hun laos ba halao atividades eskola nian, maibe inisiativa husi estudante refere hakarak halo peregrinasaun ba foho matebian no too iha dalan klaran area foho matebian nian hetan asidente ho kareta mikrolete neebe sira utiliza husi Baukau Vila ba area refere.
Nia fundamenta, viajen neebe estudante estajiaria sira halo laiha orientasaun husi eskola no tuir informasaun neebe parte seguransa husi eskola iha estudante hirak nee kontra regras instituisaun, tanba soe pasta husi moru laran ba moru liur hafoin halao viajen too hetan asidente refere.
“Tuir informasaun, sira atu ba halo peregrinasaun iha foho matebian, too hetan dezastre mak ami foin rona, ami nunka hetan informasaun ate seguransa mos la hatene, i tuir informasaun husi seguransa katak sira neebe ba halo peregrinasaun balun dehan soe pasta husi moru sorin ba foti iha moru sorin,” Leopoldo haktuir.
Estudante estajiaria ISC neebe hetan asidente iha area matebian hun mak hanesan Anastacia husi Munisipiu Ermera, Ajaulina husi Vikeke, Nitze husi Likisa, Henderika husi Lautem, Loizinha husi Likisa, Silviana husi Bobonaro Atabae,
Lurdes husi Vikeke, Nelcia husi Likisa, Nilvania husi Same, Sezia husi Manatuto, Febrinha husi Same, Idonia husi Lautem, no Ivonia husi Munisipiu Vikeke.
Estudante estajiaria ISC neebe hetan asidente iha Matebian hun, liu husi esforsu ho Sentru Saude Kelikai transporta kedas mai HoREX Baukau, hodi hetan tratamentu husi mediku sira.
Jornalista: Mikael Mali Mau
Editor: Mikael Mali Mau
