DILI, STLTIMORLESTE.com – Prezidente Republika (PR), Jose Ramos Horta hatete, rekonsiliasaun entre Timor Leste (TL) ho Republika Indonezia (RI) halo fronteira hakmatek.
Prezidente Republika Jose Ramos Horta hatoo kestaun nee liu husi nia aprezentasaun iha Palasiu Prezidensial Nicolau Lobato, Bairru Pite, Kuarta (26/11/2025).
Nia hatete, esforsu husi Lider Karismatiko Xanana Gusmao neebe halo rekonsiliasaun ho nasaun vizino Indonezia mak kria fronteira hakmatek.
Prezidente dehan, Xanana nia luta lori TL ohin loron hetan ukun rasik aan no agora hetan ona independensia, ikus halo rekonsialiasaun.
Xefe Estadu afirma, laos halo rekonsiliasaun deit maibe Xanana mos esforsu kaer fronteira maritima, Australia forte los.
“Ita hotu hotu hatene direitu internasional fo razaun ba Timor maibe fo razaun la sufisiente presiza konversa ho Australia, laiha ema seluk iha rai nee mak halo ida nee. Xanana mak dada negosiasaun ho Australia i manan fronteira maritima, Xanana mak semana ida tan ka rua ba Jakarta hahu negosiasaun fronteira maritima ho Indonezia, nia remata ona fronteira terestre falta deit pedasuk oan ruma,” dehan PR.
Nia afirma, dadaun nee Lider Karismatiko seidauk fo ba jerasaun seluk kaer ukun, tanba nia sei hakarak halo los buat balun los ona mak sei entrega ba jerasaun seluk kaer ukun lori rai nee ba oin.
Horta dehan se iha jerasaun foun ruma iha matenek no fuan boot hanesan lider Kay Rala Xanana Gusmao bele kaer iha tinan 2028, no se iha lider foun ruma prontu simu todan nuudar Prezidente Republika iha 2017 bele kaer ukun.
Jornalista: Emerenciana Pinto
Editora: Domingas Gomes
