DILI, STLTIMORLESTE.com – Eis Deputadu CNRT atual Prezidente MORENA, Cesar Valenti “Pilotu La Monu” hatete, Governu rekruta Funsionariu Kazuais atu buka votus no halo kontente militante deit, tanba benefisiu ba povu laiha.
Nia dehan, rekruta funsionariu kazuais servisu atu halo saida, tanba notisia neebe iha hatudu katak iha meza ida maibe kazuias nain 10 mak hobur lisuk meza ida ho komputador, ida nee hatudu saida, produtividade iha ka lae. Se atu rekruta tan Governu hakarak buka votus iha eleisaun nomos halo kontente militante, gasta Orsamentu Jeral Estadu laiha benefisiu ba povu.
“Lalin kazuias nee atu halo natar iha Palasiu Governu ka iha Ministeriu sira iha neeba, enkuantu agrikultor sira abandonadu osan nusa la fo subsidiu ba agrikultor, nusa lalin fali kazuais,” dehan Cesar ba STL, iha Aileu, Domingu (24/08/2025).
Eis Deputada Bankada CNRT nee la impede ukun maibe hanesan kontrola sosial nafatin propoin ba Governu diak liu lori servisu tun ba kraik lalika lalin ema ba hobur lisuk meza ida ka komputador ida.
“Husu Primeiru Ministru kontrola membru Governu sira neebe komete hahalok hanesan nee, diak liu haree ba prioridade programa Governu nee saida para produs buat diak ruma ba ita nia povu,” hatete Eis Deputadu nee.
Entretantu Prezidente Ezekuitivu Rede Feto Timor Leste, Zelia Fernandes hatutan, rekruta funsionariu kazuais sei tama dezastre boot, tanba gasta osan hodi selu ema depois mai la produtivu, ida nee sei hatodan deit Orsamentu Jeral Estadu ikus fundu bele hotu sedu.
“Primeiru hau nia observasaun ba iha preparasaun ka diskusaun Orsamentu Jeral Estadu iha Komite Revizaun Orsamental ita haree katak, ita kompara ho portal transferensia neebe ita akompanha karik ezekusaun la atinji 50%, signifika katak se kapasidade ezekusaun menus ita tenke tetu ona mos iha proposta orsamentu neebe sei mai,” dehan nia.
(eme)
