BAUKAU, STLTIMORLESTE.com – Diretor Servisu Munisipal Saude Baukau, Cristiano Cipriano Belo hatete, informasaun neebe hatoo husi Deputada Bankada Partidu Libertasaun Popular (PLP), Maria Angelina Sarmento iha Parlamentu Nasional nee la loos, tanba Servisu Munisipal Saude Baukau laiha kompetensia atu halo rekrutamentu no kontratu pesoal saude sira.
Kestaun nee Cristiano hatoo relasiona ho deklarasaun husi Xefe Bankada PLP, Deputada Maria Angelina Sarmento neebe kestiona kona-ba Servisu Munisipal Saude (SMS) Baukau, tanba pesoal saude balu neebe daudaun servisu iha fasilidade saude sira la liu husi vaga ruma, maibe bolu deit no la tuir nivel edukasaun.
Nia dehan, profesional saude kontratudu neebe daudaun servisu iha Servisu Munisipal Saude Baukau kompostu husi rejime jeral no rejime espesial, mak hanesan pesoal kontratudu ba rejime jeral rekruta husi Autoridade Munisipiu no pesoal ba rejime espesial rekruta husi Ministeriu Saude.
Nunee pesoal neebe daudaun destaka iha Baukau, laos rekruta no fo kontratu husi Servisu Munisipal Saude, tanba Servisu Munisipal laiha kompetensia atu halo rekrutamentu no kontratu, tanba durante nee Servisu Munisipal Saude Baukau diriji deit pedidu ba Ministeriu Saude no Autoridade Munisipiu Baukau hafoin parte rua liu husi Servisu Munisipal Saude koloka pesoal sira ba fasilidade saude neebe presiza.
“Hau atu deklara katak dever no knaar Servisu Munisipal Saude mak halo pedidu informa ba Autoridade Munisipiu nomos ba Servisu Sentrais atu bele koloka profesional saude mai, atu deklara iha nee katak Servisu Munisipal Saude nuunka bolu ema ida no nunka fo kontratu, kontratu nee so bele selebra liu husi Servisu Sentrais no Autoridade Munisipiu, maibe profesional saude sira nee mai Servisu Saude Baukau prontu koloka bazeia ba sira nia profesionalizmu habitasaun literaria ba area neebe prezisa sira nia tulun liu liu asistensia kuidadu saude primaria too iha komunidade, ida nee hau responde ba polemika neebe iha,” hateten Cristiano ba STL iha nia knaar fatin Tirilolo, Baukau, Kinta (09/10/2025).
Durante nia mandatu servisu hanesan Diretor Servisu Munisipal Saude Baukau nunka bolu deit pesoal sira la liu husi selesaun vaga, tanba Servisu Munisipal Saude Baukau halao deit knaar no dever hanesan submete pedidu.
Pedidu neebe durante responde husi Autoridade Munisipiu Baukau hodi kontratu pesoal nain 25 kompostu husi motorista ba karreta multi funsaun, seguransa no parte administrasaun sira enkuantu pesoal kontratudu husi Servisu Sentrais ou Ministeriu Saude nivel Nasional hamutuk 136 kompostu husi mediku, parteira, enfremeiru no enfremeira inklui tekniku aliadu kompostu area saude publiku, farmasista, limpezador, administrasaun no finansas.
Husi pesoal hirak neebe Autoridade Munisipiu Baukau no Servisu Sentrais fo kontratu Servisu Munisipal Saude koloka hotu ona ba Sentru Saude 9 no Postu Saude 30 neebe eziste iha Baukau hodi fo atendimentu asistensia saude ba komunidade sira iha baze.
Enkuantu kona-ba pesoal sira neebe servisu la tuir nivel edukasan, tanba pesoal sira neebe servisu kompostu rejime 2 mak hanesan motorista ba karreta multi funsaun, seguransa no parte administrasaun enkuantu rejime espesial hanesan mediku, parteira, enfremeiru no enfremeira inklui tekniku aliadu kompostu area saude publiku, farmasista koloka tuir habitasaun no literasia.
“Entaun atu hateten katak pesoal neebe servisu iha fasilidade saude nee tenke iha 2 atu fo asistensia saude mak liu husi profesional da saude asistensia apoiu sira mak liu husi rejime jeral nee,” katak Cristiano.
Diretor nee komenta, ba rekrutamentu tomak Servisu Munisipal Saude Baukau laiha kompetensia, tanba durante nee hanesan Diretor seidauk bolu no rekruta inklui halo selesaun dokumentu ba pesoal ida.
Jornalista: Tomas Reis
Editor: Carme Ximenes
