DILI, STLTIMORLESTE.com – Oras nee daudaun profesores nain 5 husi Eskola Sekundariu Jeral (ESJ) FINANTIL tama ba idade reforma, maibe ho rekrutamentu bolsa kandidatu husi Ministeriu Edukasaun ba nivel sekundariu nee bele substitui hikas ba sira neebe reforma.
Asuntu nee hatoo husi Diretor ESJ FINANTIL, Aniceto Berlelo ba jornalista STL iha nia knaar fatin Aimutin, Tersa nee (08/04/2025).
“Ida atu tama ba reforma nee ami iha profesor nain 5, nee feto nain 1 mane nain 4, sira seidauk hatama rekerimentu, maibe ME liu husi Edukasaun Munisipiu Dili fo ona karta mai ami submete ona naran sira neebe mak ami prepara ona, nain 5 nee ida hanorin materia português, melayu no matematika, atu substitui iha sira nian fatin, nee hanesan ita boot sira rona iha media, ME halo ona rekrutamentu profesores nível sekundariu, sira nee karik reforma, prepara atu troka iha sira nian fatin,” nia afirma.
Nia dehan, ME rasik loke ona vaga ba iha nível sekundariu ninia, karik sira nee tama iha reforma, ME antisipa.
Nunee mos Diretor EBC 10 Dezembru Komoro, Calistro A. Guterres dehan, agora daudaun iha profesores nain 5 mak atu tama ba idade reforma, foin daudaun hatama ona pedidu ba Edukasaun Munisipal, prepara ema nain lima, karik derrepente despaisu tun mai idade reforma ninia simu ona karta despaisu bele taka fila fali, nunee sala nee labele mamuk.
“Agora daudaun ami nian profesores nain 5 mak atu tama ba idade reforma, foin daudaun hatama ona pedidu ba Edukasaun Munisipal, prepara ema nain 5, karik derrepente despaisu tun mai idade reforma ninia simu ona karta despaisu bele taka fila fali, nunee sala nee labele mamuk,” nia komenta.
(jac)
