DILI, STLTIMORLESTE.com – Bainhira halo rekrutamentu bolsa kandidatu profesor labele jeral deit, maibe foti dadus kada disiplina iha kada eskola em teritoriu laran.
“Ami nian profesores reforma lo-loos nee nain 5, tanba nee mak hau atu sujere hela ba Ministeriu Edukasaun karik iha bolsa kandidatu ba iha profesor sira nee atu diak liu nee mak labele jeral deit, maibe foti dadus profesor husi kada eskola, atu nunee rekrutamentu nee ita foka kedas ba iha disiplina hira mak presiza profesor sira,” dehan Diretor ESJ nu. 4 Setembru Balide, Sergio A. da Cruz ba STL iha nia knaar fatin Balide, Tersa (25/03/2025).
Nia dehan, tanba profesores ba kada disiplina nee mak hodi halo rekrutamentu ba ida nee, nunee sira neebe mak laiha area relasaun ho sira neebe iha hela nee ba rekruta mos hanesan deit.
Nia akresenta, nee duni atu diak liu nee mak ME husu tiha dadus iha kada eskola hotu, depois haree iha kada eskola nee presiza profesor hira no iha disiplina saida, neebe rekrutamentu nee ba los ida nee, kona-ba profesores nain lima neebe idade ona nee sira hatama rekerimentu ou lae, nee presiza husu informasaun fali ba sira, tanba bazeia ba lei reforma obrigatoriu neebe promulga ona, sira hein deit ida nee bainhira mak tama iha reforma.
Iha fatin seluk, Koordenador Ensinu Baziku Filial (EBF), Hans Klemm Bairo Pite, Lucas Brandao da Silva dehan, nain lima neebe mak mai nee seidauk sufisiente, karik nain 3 mak tama reforma, nain 3 tenke subtitui iha sira nian fatin, se lae sala tolu mak mamuk, nee duni husu ME presiza koloka tan profesores hodi subtitui profesores reforma.
(jac)
