DILI, STLTIMORLESTE.com – Ho rekrutamentu bolsa kandidatu profesores nee bele rezolve eskola sekundariu balu neebe sei menus profesores.
“Inprinsipiu Ministeriu halo hela rekrutamentu ba bolsa kandidatu, katak agora iha faze ida selesaun dokumentus sira nee hotu, haree ba dokumentus aplikantes sira nee no posibilidade dia 8 ba leten ami sei hahu ba teste, no rezultadu husi teste nee ami sei koloka sira atu bele rezolve situasaun nee, hanesan ita boot sira haree rekrumentu bolsa kandidatu nee agora lao hela, tuir planu dia 8 ba leten ami atu halo ona teste liu husi eletroniku iha Komisaun Funsaun Publiku (KFP), depois ita haree se mak iha valor bele pasa ona, ami bele halo kolokasaun ba professor sira nee,” dehan Diretor Nasional Ensinu Sekundariu iha Ministeriu Edukasaun, Benjamin Gomes da Cruz Fernandes ba STL iha edifisiu ME, Kuarta nee (16/04/2025).
Nia dehan, ho rekrutamentu neebe sira halo sei rezolve problema eskola neebe too agora sei menus profesor, tanba rekrutamentu neebe halo bazeia ba quadro pesoal neebe tun ona ba baze identifika professor menus iha nee, karik menus iha português, tanba quadro pesoal mak termina.
“Depois de quadro pesoal, Ministeriu mos iha nian peritus rasik atu analiza katak eskola nee menus duni ka lae,” katak nia.
Iha fatin seluk, Aniceto Berlelo hanesan Diretor ESJ FINANTIL dehan, profesor neebe mak menus nee ba iha disiplina, fleksibilidade profesor sira neebe hanorin iha materia, ezemplu iha neeba materia multi media, maibe durante nee la abandona estudantes sira iha sala, tanba profesores neebe hanorin disiplina matematika nee tenke ba hanorin iha multimedia, ida nee iha fleksibilidade.
“Tuir lei, kurikulu profesores sira neebe mak hanorin nee tenke tuir duni idak-idak nian area espesialidade, se profesores ba area matematika nee tenke ba area matematika, tanba ida nee mak husi Ministeriu rasik sempre fo hatene ba profesores sira neebe mak hanorin nee tenke tuir idak-idak nian area espesialidade,” dehan Aniceto.
(jac)
