Rekrutamentu PNTL Foun Sei La Hili Malu

DILI, STLTIMORLESTE.com – Ministru Interior (MI), Francisco da Costa Guterres promete sei la aplika sistema familiarizmu iha rekrutamentu ba membru Polisia Nasional Timor Leste (PNTL) foun iha tinan 2025.

Lia hirak nee Ministru Interior (MI), Francisco da Costa Guterres deklara wainhira debate hela orsamentu ba Ministeriu Interior no PNTL iha Parlamentu Nasional (PN), Segunda (18/11/2024).

“Kona-ba rekrutamentu ba membru polisia foun nee iha tinan 2024 ita prepara hotu ona kondisoens hotu, inklui estatutu foun neebe promulgadu ona husi Prezidente Reppublika neebe preve ona oinsa atu halo rekrutamentu no ita labele fo oportunidade ba malu atu hili malu fali iha rekrutamentu nee hodi sai membru polisia,” hatete MI, Francisco.

Rekrutamentu membru foun PNTL tuir governsnte tenki evita hili malu no tenki bazeia ba meritu no kapasidade, nunee bele halo servisu ho diak hodi garante estabilidade iha nasaun nee.

Tanba iha prosesu rekrutamentu ba membru polisia foun nee, Ministeriu Interior sei husu apoiu ba nasaun Portugal.

No iha tinan 2025 Ministeriu Interior liu husi Komando PNTL sei hahu aununsiu ba publiku kona-ba rekrutamentu ba membru polisia foun, tanba komando prepara hotu prosedimentu sira atu halo rekrutamentu.

Iha fatin hanesan, Deputadu Bankada FRETILIN, Antoninho Doutel Sarmento husu Ministeriu Interior atu fo sai informasaun lo-loos ba publiku prosesu rekrutamentu ba membru polisia foun.

“Tenki fo sai informasaun neebe loos, nunee publika bele esklarisidu husi informasaun neebe ita fo sai ona, hau hanoin ami presiza iha esplikasaun ba ida nee,” rekomenda Deputadu Antoninho.

Entretantu iha biban nee Parlamentu Nasional mos aprova ona orsamentu ba PNTL hamutuk US$ 46.420.430 iha faze espesialidade ho votu afavor 45, kontra 0 no abstensaun 18.

Aleinde nee tuir proposta OJE 2025, orsamentu neebe aloka ba PNTL hamutuk US$ 46.420.430, husi orsamentu nee aloka salariu vensimentu US$ 39.924.528, Bens Servisu US$ 6.354.902. transferensia publika US$ 141.000, kapital menor la iha no kapital dezenvolvimentu la iha.

(alb)