DILI, STLTIMORLESTE.com – Realsiona ho rekrutamentu ba membru Polisia Nasional Timor Leste (PNTL) foun nee sei hein aprovasaun husi Ministru Interior, Francisco da Costa Guterres.
Nia dehan, iha orsamentu 2025 ninia koloka ona osan balun para atu nunee halo rekrutamentu ba membru PNTL foun.
“Ninia regras sira nee hotu ita hatoo ona ba Ministru Interior Francisco da Costa Guterres husi parte juridiku neebe sei haree hela, wanhira sira aprova mak ita foin hela inisia prosesu ba iha rekrutamentu ba ita nia polísia foun sira, neebe ita hein deit aprovasaun husi Ministru Interior,” hatete Komandante Jeral PNTL, Komisariu Jeral Polisia, Henrique da Costa ba jornalista sira iha Largo Lesidere Dili, Kinta (15/05/2025).
Nia esplika, persiza halo rekrutamentu ba Polisia foun, atu nunee prienxe fila-fali ba numeru ajente ninia.
“Tuir ita nia planu nee laos ba 2025 deit, maibe tinan-tinan ita tenke iha rekrutamentu ba ajente sira, tanba daudaun nee mamuk hela,” nia deklara.
Iha fatin ketak, Akademista UNTL, Adérito da Silva informa, promosaun tranzitoria bazeia ba lei organiza PNTL dekreitu lei numeru 34/2024 nee los, maibe Ministeriu Interior mos tenke hanoin atu aprovasaun lalais ba rekrutamentu ba membru polisia foun sira.
“Ita hotu akompanha Membru PNTL iha Munisípiu 13 inklui RAEOA, membru sira hotu-hotu tula hotu diviza, tanba nee ita haree fatin hanesan ajente xefe, ajente prinsipal sira nee fatin mamuk ona, tanba rekrutamentu nee aselera lalais,” nia afirma.
(jen)
