OEKUSI, TIMORLESTE.com – Relasiona ho politika relasaun bilateral entre Timor Leste (TL) ho Indonezia sai ezemplu ba mundu, tanba husi istoria bele hafanu sidadaun internasional sira atu halo tuir.
“Uluk ita hasoru malu hanesan inimigu, hodi hamosu referendum ba independensia, tanba nee husi rekonsiliasaun nee, ita hotu tenke hatene oinsa hodi rai ba kroat sira neebe uluk halo ita oho malu, halo ita haree malu ladiak, tanba nee tenke hatudu kultura fraternidade, nunee bele hatudu istoria bilateral ida nee ba mundu tomak,” dehan Prezidente Autoridade Munisipiu RAEOA, Rogério Tiago Lobato liu husi nia diskursu ba eventu festival fronteira 2024 iha Oekusi, Tersa (15/10/2024).
Nia hatete, politika relasaun bilateral ida nee tenke avansa ba oin, husi istoria moruk neebe iha, tenke hanoin oinsa hametin rekonsiliasaun, tanba politika ba dezenvolvimentu nasaun TL nian, liu-liu sai membru ba Association of Southeast Asian Nation (ASEAN), Indonezia apoiu boot tebes-tebes.
Entretantu Visi Primeiru Ministru, Ministru Koordenador Asuntu Sosiais, Ministru Dezenvolvimentu Rural, no Abitasaun Komunitaria, Mariano Assanami Sabino afirma, relasaun entre komunidade husi nasaun rua tenki hametin nafatin, hodi hanoin ba prosesu dezenvolvimentu ida nee sei mosu iha futuru.
Tanba husi dalan rekonsiliasaun nee hatudu ba povu hotu-hotu iha mundu, oinsa bele hametin relasaun bilateral ida nee sai metin liu tan, oinsa bele estabiliza prosesu rekonsiliasaun ida nee sai prosesu efetivu ba sidadaun Timoroan no sidadaun Indonezia sira, atu haree katak, prinsipiu sira nee sai relevante, husi prosesu ekonomia sosial, politika, nunee bele kontribui ba dezenvolvimentu nasional.
Iha sorin seluk, Sekrekretariu estadu Arte no Kultura (SEAK), Jorgé Cristovão dehan, husi eventu sira nee importante tebes, tanba nee liu husi prosesu nee bele promove identidade TL nian ba nasaun seluk atu haree no halo tuir kultura neebe iha.
Tanba nee, prosesu eventual sira nee harii ona, hanesan festival rekonsiliasaun ida atu hatudu ba mundu tomak, liu-liu nasaun bilateral sira, katak interkambiu kultural ida nee bele sai ezemplu ida atu ema hotu bele partisipa no halo tuir identidade sira neebe iha.
(EST 2)
