DILI, STLTIMORLESTE.com – Relatoriu auditoria Zona Espesial Ekonomia Sosial Merkadu (ZEESM) iha rua, ida mak pedidu husi Ministeriu Publiku ba iha Tribunal Rekursu (TR) hodi halo julgamentu.
Tuir Prezidente Tribunal Rekursu (PTR), Deolindo Dos Santos katak, auditoria iha rua ona, ida mak pedidu mai husi Ministeriu Publiku hodi julgamentu iha TR, tanba nee mak julgamentu lao hela iha TR no julgamentu ho Juiz Singular.
Nia hatutan, nia parte labele hateten saida kona-ba auditoria nee rasik, tanba kuandu julgamentu nee lao hela mak iha rekursu, nia parte mos sei hola parte hotu atu foti desizaun kona-ba rekursu nee. Maibe relatoriu nee iha rua, no aprova hotu ona.
“Relatoriu auditoria ba ZEESM nee dala rua aprova hotu ona, iha balu kumpri konvensaun sira nee, iha balu la halo, no iha buat ida mak presiza haree, labele haree deit ba auditoria, maibe presiza buka tuir hanusa mak aparser konjer estadu nee, kada tinan buka tuir atu hatene,” dehan PTR, Deolindo ba jornalista sira iha Kaikoli, Dili, Kuarta (06/11/2024).
Prezidente Tribunal Rekursu nee dehan, aparser konjer ba estadu 2023 nee, aprova tiha ona no haruka ona ba iha Parlamentu Nasional, nia apresiasaun nee laos ba buat ida rua deit, maibe buat barak inklui mos ZEEMS, no halo apresiasaun ba ezekusaun orsamentu durante ezersisiu ba 2023 nian.
Tuir observasaun jornlista STL nian, iha prosesu ida mak Tribunal Rekursu halao hela julgamentu, no oras nee daudaun tama ona ba iha faze alegasaun.
Antes nee rona ona sasin sira, tanba nee iha loron (06/11/2024) tama ona ba iha faze alegasaun.
Iha faze alegasaun nee, Prokurador Pascasio da Roza Alves, alega ho nia parte balu, ida kona-ba observasaun Jeral, no ida kona-ba fundamentus faktus. Iha alegasaun nee, Prokurador haree katak, iha pagamentu balu ilegal, tanba nee husu Tribunal atu tetu faktus hotu molok foti desizaun.
Demandadu MA nian, Advogada Privada Soraia Marques deklara iha alegasaun nee katak, la iha provas sufisiente, la iha prejuizu ba estadu, ilisitu finanseiru mos sira la konsege prova, la iha faktus ida sira konsege provas.
Demandadu FSM nian, Defensor Publiku, Fernando de Carvalho katak, alegasaun neebe sira hato, tuir ida idak nia faktus neebe maka imputa husi Ministeriu Pubiku ba ida idak nia kliente.
“Alegasaun hau hatoo relasaun ho faktus neebe imputa ba hau nia kliente, nia iha ADN servisu tekniku liu-liu ba rekolha dokumentus sira hanesan, sertidaun de devidas, ho garantia bankaria, nia servisu relasaun ho deit buat sira nee, la iha responsabilidade ida kabe ho akuzasaun neebe Ministeriu Publiku hato ona,” dehan Fernando.
Frenando dehan, nia kliente servisu haree deit dokumentus la envolve aan iha terenu halo fiskalizasaun, la envolve aan iha kontratu.
Tanba nia kliente MP akuza ho prejuizu 107 mil liu, iha alegasaun husu Tribunal atu absolve nia kliente, tanba konsidera la iha responsabilidade finanseira ba aktus neebe mak deskonfia akontese tuir relatoriu husi Tribunal de Kontas.
Nunee ba prosesu ida nee iha demandadu hamutuk nain 12, no demandadu numeru ida mak eis Prezidente RAEOA MA, tuir kedan demandadu G, no tuir kedan ho demandadu sira seluk.
Prosesu julgamentu nee, prezinde husi Juiza Singular, Juiza Maria Natercia Gusmao Pereira, parte estadu nian reprezenta husi Prokurador nain rua, Alfeu Moreirra, no Pascasio da Roza Alves, no Demandadu nain 12 reprezenta husi Defensor Publiku no Advogadu Privadu balu.
(ter)
