DILI, STLTIMORLESTE.com – Prezidente Tribunal Rekursu (PTR), Afonso Carmona hatete, relasiona ho formadus kandidatu sira kona-ba kareira juiz nian durante halao faze pratika iha Sentru Estudu Portugal hamutuk nain 13, maibe husi rezultadu pratika no ikus mai relatoriu kona-ba kandidatu sira nian naran tama iha Tribunal Rekursu (TR) ho kandidatu juiz nain 12 deit.
“Relatoriu tama tiha ona temi nain 12 deit, ema formasaun kompetensia formasaun nian ita labele hatene, so desde inisiu ita envolve karik ita dehan ita nia ema lakon, agora Sentru Formasaun no Ministeriu Justisa nia kompetensia, tanba nee ita seidauk too neeba, prosesu lao hela ita sei akompana hela situasaun sira nee la hatene problema saida, “dehan PTR, Afonso ba Jornalista sira, iha Kaikoli, Dili, Kinta (28/08/2025).
Prezidente Tribunal Rekursu nee seidauk hatene kona ba kandidatu neebe naran la iha, tanba kona ba formasaun nian husi Sentru Formasaun Juridiku no Judisiariu no Ministeriu Justisa (MJ) mak iha kompetensia.
No lista kandidatu neebe mai iha Tribunal iha kandidatu hamutuk nain 12 deit, tanba nee Konselhu Superior Majislatura Judisial (KSMJ), buka tuir kandidatu nee, maibe too agora seidauk hatene.
“Razaun kandidatu ida la iha Tribunal la hatene, tanba durante formasaun husi sentru Estudu Portugal maka avalia sira, tanba nee Tribunal akompana deit,” dehan nia.
Maibe nia dehan, kona-ba kandidatu ida neebe sei halo hela rekursu nee oportunidade ba nia iha ka lae husi Tribunal la hatene, tanba prosesu hanesan nee ba fali iha Ministeriu Justisa (MJ) kona-ba reklamasaun.
Tanba naran kandidatu nain 12 KSMJ deside no haruka ba publika iha Jornal da Republika, tanba tuir lei presiza loron 10 atu halo planu hodi fo tomada posse ba kandidatu sira, atu bele tama ba iha faze estajiu. No tuir lei foun neebe iha tenke nomeia tiha sira maka tama iha posse, nunee nomeia ona sira hein tama ba posse deit.
Iha fatin ketak, Direkora Sentru Formasaun Juridiku no Judisiariu, Marcelina Tilman da Silva hatete, sira hamutuk 24 neebe maka tuir formasaun faze pratika iha Portugal husi Janeiru too iha Junhu, sira remata ona formasaun pratika nian, sira iha ona Timor hein hela sira nia nomeasaun ba sai Juiz estajiadu, Prokurador estajiadu no mos Defensor Publiku estajiadu, no sira remata faze pratika iha loron 30 fulan Junhu.
“Agora sira nia rezultadu husi Sentru Estudu Portugal haruka ona mai, ami simu iha loron 30 fulan Julhu, konvoka enkontru pedagojiku hodi aprova sira nia rezultadu final neebe iha neeba haruka mai, rezultadu neebe sira 24 nee Juiz 13, Prokurador nain hitu no Defensor nain 4, sira hamutuk 24 nee husi Juiz nain ida mak la liu hodi passa ba iha faze estajiu,” dehan nia.
Marcelina hatutan, Juiz nian iha nain ida la liu tanba, hetan klasifikasaun negativa husi formasaun faze pratika iha Portugal, tanba tuir ita nia dekretu lei numeru 8/2024 dehan avaliasaun faze pratika nee Portugal maka halo tanba sira ba halao faze pratika iha neeba. No dekretu lei nee mos hateten katak, faze pratika nia valor nee 40 porsentu, ho faze teoria iha sentru formasaun neebe fo ba sira 60 porsentu hamutuk ho valor faze estajiu nian hamutuk 100 porsentu.
Jornalista: Terezinha De Deus
Editora: Carme Ximenes
