DILI, STLTIMORLESTE.com – Relatoriu neebe entrega husi Ekipa Trabalhu Reforma Setor Justisa ba iha Ministeru Justisa, iha pontu importante lima, liu-liu kona-ba rekursu umanu.
“Rekursu umanu sai hanesan prioridade formasaun ba iha ita nia ema sira, haruka ita nia ema sira atu melhora sira nia konhesimentu iha lingua no teknika jurídiku, hau hakarak hateten katak, asuntu ida importante nee mak ida rekursu umanus,” dehan Ministru Justisa, Sergio Hornai ba jornalista sira iha Kaikoli, Dili, Tersa (21/01/2025/).
Nia hatutan, depois mak koalia kona-ba alargamentu, hakarak lori tan justisa hakbesik ba iha komunidade, tenke ho ema ida kualifikasaun aas, atu ho estrutura neebe natoon, ema neebe iha kbiit atu halo desizaun iha kordenasaun kooperasaun iha konhesimentu materia tekniku, relasaun ho servisu neebe nia halo.
Tanba formadus sira ba ona iha Portugal sei haree Juiz Internasional sira atu mai hodi kontribui mos ba iha reforsa sentru formasaun, hirak nee hotu atu halo reforma ba iha setor justisa.
Iha fatin ketak, Jurista Jose Maria Guterres dehan, setor justisa numeru rekursu umanus sei menus.
“Setor justisa numeru rekursu umanu sei menus, ba oin sentru formasaun tenke iha planu atu kontinua loke formasaun ba iha formadus sira, hodi bele aumenta numeru rekursu umanu atu apoiu servisu Tribunal nian,” dehan Jose.
Aleinde nee, Prezidente Asosiasaun Majislatura Judisial Timor Leste, Antoninho Gonsalves dehan, numeru Juiz ohin loron 30 resin deit.
“Numeru Juiz 30 resin deit mak koloka ba iha Tribunal Primera Instansia haat, no Tribunal Rekursu ita bele dehan numeru nee seidauk sufisiente,” dehan nia.
(ter)
