DILI, STLTIMORLESTE.com – Relijiaun foun Katolika Karismatika Independente Timor Leste (TL) neebe mak espalha iha media sosial, parte igreja konsidera ilegal no laiha konhesimentu. Tanba nee, husi parte igreja halo aprosimasaun ho instituisaun Polisia Nasional Timor Leste (PNTL) atu halo investigasaun ba aktu hirak nee.
Liafuan nee haktuir husi Arsebispu Arkedioseze Metropolitana Dili, Dom Virgilio Cardeal do Carmo da Silva, SDB ba jornalista sira iha Camara Eclesiastika Lecidere, Segunda nee (25/11/2024).
Dom Virgilio hatete, horiseik dader hakfodak ema haruka mensajen hirak nee mai, kona-ba sira neebe hatais kazula vestimentu amululik ida nian, tuir liturjia igreja ninia lalaok eventu hirak nee fo liu husi serimonia diakonu sira wainhira ordena, nomos amululik liu husi ordenasaun mak ofisial Bispu entrega sira nia estola, vestimentu sira uza hodi selebra eukaristia.
“Maibe mosu iha publiku ema neebe ami mos la rekonhese, ida nee amululik ka la amululik la hatene, tanba amululik neebe tama iha Dioseze ida tuir dalan liu husi ida neebe tenke iha konhesimentu liu husi Bispu idak-idak, nunee mos amululik atu selebra misa iha Dioseze no Parokia ida, nia mai husi neebe ordinariu lugar tenke hatene, kuandu ema mai ami la hatene, ita konsidera katak ida nee ilegal,” dehan Dom Virgilio.
Ilegal tanba la hatene ema mai husi neebe, la hatene se mak selebra, se mak ida nee, ema hotu hakruk ba lei iha nasaun ida nia okos, tuir dalan legal neebe iha.
Dom Virgilio hatete, agora daudaun halo hela aprosimasaun liu husi instituisaun neebe iha kompetensia, ida nee husu halo investigasaun kona-ba aktus hirak nee, tanba igreja hotu hatene no Padre sira mos konhese sira hotu neebe mak servisu iha dioseze 3 nian.
(joa)
