DILI, STLTIMORLESTE.com – Maske ensinu superior iha rai laran kada tinan halo graduasaun no graduadus barak remata estudu, maibe barak la hetan servisu.
Pedro da Costa Moniz hanesan graduadu husi UNPAZ, Fakuldade Ekonomia, Departamentu Jestaun dehan, nee realidade duni, graduadus barak remata estudu too agora balun seidauk hetan servisu, tanba atu servisu iha neebe, diak liu labele hein servisu maibe iha osan halo deit negosiu para bele hetan osan.
“Se ita hein deit mak Governu atu fo servisu ba ita, nee hau hanoin susar oituan, tanba ita nian kampu servisu menus, se lae ita ba tuir kursu atu nunee ita ba servisu iha rai liur, tanba ita haree ita nian maluk Timoroan barak agora servisu iha Australia, Korea no Inglaterra, tanba ita eskola hotu iha Timor la halo buat ida, diak liu ita iha osan halo negosiu mos bele, ho nunee ita bele hetan osan,” haktuir Pedro ba STL liu husi telefone, Domingo nee (25/05/2025).
Iha fatin la hanesan, Diretor Ezekutivu TLCE, Jose Monteiro dehan, los duni too agora graduadus barak mak seidauk hetan servisu no balun ba servisu iha rai liur tanba iha rai laran nee menus kampu servisu, tanba ho kampu servisu neebe mak menus halo graduadus barak sai ba servisu iha rai liur.
“Los duni too agora ita nian graduadus barak mak seidauk hetan servisu no balun ba servisu iha rai liur tanba iha rai laran nee menus kampu servisu, tanba ho kampu servisu neebe mak menus halo graduadus barak sai ba servisu iha rai liur,” nia afirma.
Nunee mos Reitor ISC, Sebastião Perreia dehan, universidade prepara deit ema, agora liga ba menus kampu trabalhu nee governu mak bele loke kampu servisu ba graduadus hirak neebe hotu ona estudu iha universidade, bainhira too tinan termina ona nee sira hahu halao graduasaun.
“Universidade prepara deit ema, agora liga ba menus kampu trabalhu nee governu mak bele loke kampu servisu ba graduadus hirak neebe hotu ona estudu iha universidade, bainhira too tinan termina ona nee sira hahu halao graduasaun,” dehan nia.
(jac)
