DILI, STLTIMORLESTE.com – Prezidente Asosiasaun Maestradu Timor-Leste (AMTL), Juis Antoninho Gonsalves hatete, formadu neebe halao formasaun durante fulan 6 iha Portugal, depois fila mai Timor Leste (TL) sira sei kontinua halao tan estajiu durante tinan 1, kuandu sira pasa ona iha formasaun neebe halao iha Portugal.
“Sira fila mai Governu sei entrega sira ba Konselhu Superior Majislatura Judisial, depois mak Konselhu halo planu fali ba sira atu lao oinsa, maibe agora sei iha Governu nia liman,” dehan Antoninho Gonsalves ba STL iha Kaikoli, Dili, Kinta (09/01/2025).
Nia hatutan, formadu sira nee tenke aproveita ho diak, estuda no aprende esperiensia husi Juiz sira antigu neebe iha, sira tenke aproveita oportunidade nee tanba laos ba beibeik, maibe ida nee hanesan oportunidade ida ba dala ida.
Formasaun neebe halao durante fulan 6 iha Portugal la signifika sira bele liu hotu, maibe iha formasaun nee mos sei iha teste ikus, dala ruma bele liu hotu no dala ruma balu labele liu, se sira liu informasaun mai iha Sentru Formasaun depois ba iha Konselhu, katak sira iha aproveitamentu diak, sira bele pasa.
Maibe kuandu iha teste formasaun sira pasa fila mai Timor sira iha Governu no Sentru Formasaun Juridiku nia liman, depois mak Governu entrega formal por eskritu ba iha Konselhu Superior Majislatura, depois mak Konselhu iha planu atu implementa planu ba formadu sira.
Iha fatin ketak, Jurista Jose Maria Guterres dehan, formasaun neebe formadu sira halao iha Portugal, hanesan parte ida atu aumenta tan sira nia konhesimentu.
“Formasaun nee atu aumenta sira nia konhesimentu, maske antes nee sira halao ona formasaun iha Sentru Formasaun, maibe ida nee atu tulun sira hodi hasae tan sira nia konhesimentu,” dehan nia.
Antes nee, Diretora Sentru Formasaun Juridiku no Judisiaria, Marcelina Tilaman deklara ona katak, iha formadu Juiz nain 13, Defensor Publiku nain 4 no Ministeriu Publiku nain 7 mak desloka ona ba Portugal, hodi halao formasaun durante fulan 6.
(ter)
