DILI, STLTIMORLESTE.com – Embaixador Timor Leste ba Angola, Ivo Jorge Valente bainhira remata simu pose husi Prezidente Republika Jose Ramos Horta hodi hakat ain sai husi palasiu oin nakukun, nunee seguransa Palasiu Prezidensial asegura bolu tuur tiha, la too minutu 2 mediku prezidensial too fatin hodi konsulta.
Tuir observasaun neebe mak STL hetan, iha loron Sesta nee (11/07/2025) Prezidente Republika Jose Ramos Horta fo pose Ivo Jorge Valente asumi kargu nuudar Embaixador Timor Leste ba Angola, bainhira remata simu pose embaixador hamutuk familia tun husi fatin pose hodi halo entrevista ho jornalista.
No remata halo entrevista, embaixador hakat sai husi palasiu hodi fila hikas ba rezidensia maibe oin nakukun atu monu nunee embaixador tuur tun, nunee seguransa no funsionariu sira bolu embaixador tuur iha minutu balun, Mediku husi Prezidensia Republika too kedas iha fatin hodi halo konsulta.
Mediku Prezidensia Republika too iha fatin husu Embaixador Ivo Jorge Valente nia kondisaun diak oituan ka.lae? No Embaixador resposta katak ohin dader la matabisu buat ida, aleinde nee Doutor husu antes nee iha moras tensaun, embaixador hatan sim, aleinde nee husu moras seluk.
Mezmu nunee, Embaixador Ivo Jorge Valente bainhira doutor husu kondisaun, embaixador nafatin hatan perguntas hotu ho diak.
Bainhira Doutor haree embaixador nia kondisaun doutor haruka funsionariu seguransa sira sai husi fatin iha minutu balun Mediku Prezidensia Republika lori embaixador ba iha Klinika Prezidensia Republika hodi halo tratamentu.
Tuir mediku Prezidensial Republika neebe lakohi temi naran hatete, oras nee daudaun embaixador nia saude diak ona.
“Laiha autorizasaun atu halo entrevista nee privadu, maibe agora nia kondisaun diak normal, so iha raan midar tun demais, maibe agora daudaun nia kondisaun rekoopera ona, la presiza atu ba tan iha Hospital Nasional Guido Valadares,” katak Mediku Espesialista.
(eme)
