DILI, STLTIMORLESTE.com – Estudante sira neebe halao hela estudu iha rai liur, iha problema ruma ligasaun ho pasaporte tenke hatoo ba iha adidu sira hodi buka solusaun.
Tuir Diretor Jeral Servisu Rejistu Notariadu, Agustinho Gonsalves Viera katak, estudante sira neebe eskola iha rai liur sira tenke hatoo ba adidu ka embaxador iha rai neebe sira eskola ba, atu adidu edukasaun iha rai liur identifika estudante sira neebe pasaporte mate ona atu hato pedidu mai iha Ministeriu Justisa, mai iha Diresaun Jeral Rejistu Notariadu atu haruka tekniku sira desloka ba hodi hasai foto ba estudante sira nee.
“Husu ba adidu husi Edukasaun nian neebe koloka iha Estranjeiru Diaspora, ajuda identifika hela estudante hira mak atu prolonga sira nia pasaporte, pasaporte mate ka halo foun, halo pedidu mai iha Ministeriu Justisa, ba iha Diresaun Jeral Servisu Rejistu Notariadu atu haruka tekniku sira ba hasai foto,” dehan nia ba STL iha Mandarin, Kuarta, (09/04/2025).
Nia hatutan, primeiru tenke identifika tiha lai nia numeru, maibe se sira iha Malazia sira tenke mai Timor hodi tarata, banhira sira eskola ferias.
Reforsa, adidu Edukasaun sira mak identifika, ka Estudante sira mak hatoo sira nia problema ba iha embaxador ka adidu sira atu sira bele fo hatene mai, no sira neebe iha Portugal Inglaterra, Amerika la iha problema, tanba adidu Justisa nian koloka ona iha neeba hodi hasai foto ba sira, Jepan no Korea do Sul hotu ona, agora hein ba iha Australia deit. No iha problema hatoo ba iha embaxador ka adidu neebe koloka iha diaspora atu identifika deit ema nain hira mak presiza atu atende kona-ba pasaporte nian.
Akresenta tan, seidauk iha informasaun ruma mai iha diretor kona-ba estudante sira neebe iha rai liur atu halo renovasaun ba pasaporte, maibe rona deit ofisiozamente seidauk iha karta ida mai hodi hateten estudante sira presiza atu halo renovasaun pasaporte.
Iha fatin ketak, Akademiku Universidade Nasional Timor Lorosae (UNTL), Rafael de Jesus dehan, adidu sira tenke servisu hamutuk ho estudante sira, atu buka solusaun ba preokupasaun balu neebe estudante sira hasoru.
“Importante adidu sira tenke servisu hamutuk ho estudante sira atu buka solusaun ba preokupasaun neebe estudante sira enfrenta,” dehan nia.
Hatutan tan, ohin loron estudante barak mak halao hela estudu iha rai liur, tanba nee importante mos atu haree kona-ba kestaun balu liga ba iha pasaporte nian.
(ter)
