DILI, STLTIMORLESTE.com – Renumeratoriu ba bolsa kandidatu profesores iha faze primeiru, Ministeriu Edukasaun (ME) sei lori ba Komisaun Funsaun Publika (KFP) hodi hatun despaisu ba Ministeriu Finansas bele halo pagamentu.
Haktuir Diretora Rekursu Umanu iha ME, Anita Tavares Ribeiro de Jesus ba STL iha Vila Verde, Kinta nee (17/10/2024).
“Pagamentu subsidiu inisial ba profesores bolsa kandidatu iha faze primeiru, ida nee ita halo prosesu hotu ona, tanba lista prezensa tama hotu tiha ona, no ohin ami lori ona ba iha KFP para bele hatun despaisu ba iha pagamentu profesores sira nee, sira ita propoin mos sira nian subsidiu de transporte, atu nunee KFP hatun despaisu, no KFP rasik sei enkaminha ba Ministeriu finansa hodi halo prosesu, ita espera iha fulan Novembru nia laran sira bele hetan direitu ida nee,” afirma Anita.
Tuir Nia, prosesu renumeratoriu ba profesores nee finaliza ona, ohin tenke lori ba iha KFP para bele hasai despaisu, tanba bazeia ba despaisu mak sei halo pagamentu ba sira, pagamentu ida nee laos haree ba iha fulan lae, maibe sira ohin 17 ona, labele ona, iha Novembru mak halo prosesu pagamentu, nee duni ohin tenke lori ba iha KFP, depois haruka ba iha finansas.
“Ami nian tekniku sira husi nee mos sei ba hamutuk ho tekniku sira husi Ministeriu Finansas, nee para bele halo prosesu ida nee, renumeratoriu nee laos haree ba fulan hira, tau iha lei nee hatur ona katak, tres bezes salariu, iha salariu nee ami haree konforme sira nia bacharelatu ka lisensiatura, ho sira nian subsidiu transporte, agora subsidiu transporte nee mak ita sei iha retroativu oituan, hahu husi ita koloka sira iha fulan Maiu too Junhu, entaun ita hahu husi Junhu nee mai oin, ida nee ita sei halo sira nian pagamentu,” nia esplika .
Nia akresenta, halo pagamentu ba subsidiu transporte ba profesores sira neebe mak koloka ona faze primeiru ninia, husi parte rekursu umanu ME simu ou hetan hotu ona sira nian lista prezensa husi eskola idak-idak, neebe mak profesores sira halao knaar ba.
Iha parte seluk, Diretor EBC Manleuana, Carlos Correia afirma, renumeratoriu nee mak seidauk hetan, maibe profesores sira nian salariu kada fulan nee lao normal, tanba iha kolokasaun ba faze primeiru ninia mai iha eskola ida nee profesores nain rua.
“Hau husu ita nian profesores nain rua neebe mak halo kolokasaun iha faze primeiru mai nee nain rua, sira nian salariu kada fulan nee lao diak hanesan baibain, maibe renumeratoriu nee mak dehan sira seidauk hetan, tanba buat sira nee sei liu husi prosesu nia laran, too tempu sira sei hetan,” nia esplika.
Nunee mos Juvita de Jesus Lopes da Costa, profesora materia ingles husi EBC Manleuna hatete, kona-ba renumeratoriu ninia nee, hahu husi fulan neebe mak sira simu tomada de posu iha fulan Maiu 2024, tanba tuir informasaun neebe asesu husi kolega sira katak, renumeratoriu nee sei iha prosesu nia laran.
(jac)
