DILI, STLTIMORLESTE.com – Reprezentante The Asia Foudation mai komprimenta Prezidente Republika Jose Ramos Horta, aleinde nee aprezenta mos programa organizasaun nia ba Xefe Estadu.
Bainhira remata hasoru malu, Reprezentante Interina Coutry Asia Foudation, Heidi Arbuckle ba jornalista sira iha Palasiu Prezidensial Nicolau Lobato, Bairo Pite, Segunda (02/03/2026) hatete, sente haksolok mai halo enkontru ho Prezidente Republika hodi komprimenta nomos hatoo planu no programa The Asia Foudation ba Xefe Estadu.
“Haksolok tebes hasoru Prezidente Republika Timor Leste. Hau aprezenta hau-nia-aan ba Prezidente no ami mos koalia kona-ba programa sira Fundasaun ASIA nian, neebe durante tinan 30 resin halao servisu iha Timor Leste,” dehan nia.
Nia hatete, iha hasoru malu nee diskute kona-ba posibilidade atu kolabora iha programa sira Fundasaun Asia nian iha area oin-oin, inklui promosaun no dezenvolvimentu turizmu iha Timor Leste, no mos halakon violensia hasoru feto. Iha mos programa seguransa nian, kolaborasaun ho Polísia Nasional Timor Leste (PNTL), no klaru sira fo apoiu ba organizasaun lokal sira, haree hela oinsa ami bele dezenvolve forsa rasik.
“Entaun, ksolok tebes hasoru malu ho Prezidente Jose Ramos Horta. Nia fahe ninia esperiensia hodi apoia turizmu iha Timor Leste no ninia prioridade sira iha Timor-Leste, no oinsa Fundasaun ASIA ajuda hela rejiaun oioin iha Timor Leste,” katak nia.
Iha hasoru malu nee Prezidente Republika Jose Ramos Horta haktuir katak, nia sente kontente hasoru malu ho reprezentante Interina The Asia Foudation, Prezidente konhese Fundasaun Asia kleur ona no nia hatoo katak nia prioridade agora mak oinsa organizasaun internasional sira bele servisu hamutuk ho komunidade sira iha baze atu ajuda duni avansa produtividade komunidade lokal no família sira neebe iha negosiu, atu nunee sira bele oferese servisu turizmu ospitalidade ba bainaka turizmu ka bainaka sira neebe vizita Timor Leste.
(eme)
