DILI, STLTIMORLESTE.com – Reprezentante IOM iha Timor Leste, Jewel Trishia Ali halao enkontru ho Prezidente Republika (PR), Jose Ramos Horta, hodi diskuti kona-ba jestaun seguransa no migrasaun.
Lia hirak nee hotoo husi Reprezentante IOM iha Timor Leste, Jewel Trishia Ali ba jornalista sira, bainhira remata enkontru ho Prezidente Republika, iha Palasiu Prezidensial, Nicolau Lobato, Bairo Pite, Dili, Tersa (07/01/2025).
“Hau nuudar xefe misaun ba Organizasaun Internasional ba Migrasaun. Hau too iha Timor Leste fulan 5 liu ba no hau foin halao sorumutu seluk ho Prezidente Timor Leste, hodi fo informasaun ba nia kona-ba saida mak OIM halo ona iha nasaun nee durante tinan rua ikus nee no liu-liu iha fulan hirak ikus nee hau too mai. Hau mos koalia ho nia kona-ba prioridade balu kona-ba asuntu migrasaun nian neebe lao ba oin,” dehan Jewel.
Nia hatutan, asuntu balu neebe nia ho Xefe Estadu diskuti nee liga ho atividade saida mak IOM bele envolve aan no asuntu seluk mak liga ho jestaun ordem no seguransa iha Fronteira.
“Asuntu balu neebe ita diskuti ona hanesan OIM ita envolve iha area balun, tanba migrasaun nee taka dalan. Tanba nee ami diskuti kona-ba asuntu jestaun orden no seguransa. Ami mos diskuti kona-ba kestaun sira kona-ba dezlokasaun neebe akontese, tanba perigu natural sira hanesan inundasaun no rai-slide hotu iha forma hirak nee, aspetu importante barak husi ami nia servisu iha Timor Leste,” katak nia.
Iha hasoru malu nee, Prezidente Republik, Jose Ramos Horta hatete, sente kontente tebes hodi haree progresu servisu neebe mak IOM halo ona iha Timor Leste.
PR Horta kontente tebes ho servisu neebe IOM halo ona nuudar parte husi sistema ONU nian no PR Horta hakarak IOM atu kontinua halao servisu hodi bele apoiu ba Timor Leste nia diak iha futuru.
(eme)
