DILI, STLTIMORLESTE.com – Reprezentante jornalista eleitu ba Konselhu Imprensa (KI) presiza ema neebe fo fuan ba servisu, hodi responsabiliza preokupasaun jornalista sira iha publiku, laos tau ema neebe buka riku deit.
“Ita tenke hili no tau ema neebe iha vontade atu reprezenta duni jornalista sira iha Konselhu Imprensa nian, tanba konfiansa neebe ita hiit nee atu responsabiliza ba nesesidade jornalista sira nian, bainhira hasoru probelema ruma ka falhansu ruma iha informasaun iha publiku,” dehan Rerezentante jornalista ba KI iha mandatu 2023-2025, Amito Araujo “Quonusere” hafoin halo eleisaun reprezentante jornalista ba KI, iha Salaun Katedral Dili, Sesta (13/12/2024).
Nia dehan, nuudar reprezentante ida tenke iha vontade no espiritu servisu, laos servisu dupla, hodi haluha preokupasaun jornalista sira nian, signifika reprezentante ida labele buka riku deit, tanba nee husu atu haburas nafalun liberdade espresaun no liberdade imprensa.
Tanba ema neebe sai reprezentante jornalista iha KI, ho objetivu atu defende laos atu husik, tenke tau matan ba jornalista sira, servisu hamutuk ho jornalista sira, nunee iha preokupasaun kuandu jornalista sira hasoru iha publiku bele fo asistensia neebe diak.
“Hau husu atu ema hanesan reprezentante, labele asumi pozisaun, hanoin oinsa buka riku deit, maibe presiza profisionaliza servisu hodi defende jornalista, bainhira hasoru problema ruma iha publiku, husi kestaun sira nee mak jornalista sira hili jornalista atu sai auto-defeza neebe diak ba jornalista sira iha Timor Leste,” nia sublina.
Iha fatin hanesan, Prezidente Konselhu Imprensa (KI), Otelio Ote afirma, eleisaun hili reprezentante jornalista ba KI, nee oportunu ida neebe importante, tanba nee jornalista sira mak tenke hili ema neebe iha komitmentu diak, iha politika diak atu sai hanesan defensor publiku ba jornalista sira iha Timor Leste.
Tanba nee husu ba jornalista sira hotu atu hili ema neebe iha responsabilidade ba direitu espresaun jornalista nian iha Konselhu Imprensa, atu bele sai defendor ba direitu jornalista nian bainhira hasoru problema ruma liga ho misaun jornalista iha terrenu.
Entretantu Prezidente TLPU, Candido Alves afirma katak, atu reprezenta jornalista ba KI hanesan responsabilidade ida neebe boot, hodi tau matan ba jornalista sira, bainhira hasoru problema ruma.
Tanba nee kandidatu neebe mak jornalista sira eleje ona atu reprezentante jornalista hotu iha KI presiza iha komitmentu neebe diak, no sai auto-defeza ba jornalista emterritoriu nasional tomak, bainhira hasoru problema ruma presiza defende tuir lei haruka, tanba nee fiar katak konfiansa neebe jornalista hili tuir nia haree, bele haburas direitu ba espresaun jornalista ho diak,” nia hateten.
(EST 1)
