DILI, STLTIMORLESTE.com – Governu liu husi Prezidente Autoridade Munisipiu (PAM) Dili husu Autoridade lokal sira tenke tau atensaun ba Vendadores sira labele okupa espasu publiku atu faan sasan liu-liu faan iha Trotoar leten.
“Ita nia komunidade sira barak mak buka moris iha dalan, hanesan faan modo, ropa no sasan seluk tan, entaun ita hanesan Autoridade lokal Suku nian tenke tau atensaun ba sira, atu nunee Vendadores sira nee labele ukupa fali fatin publiku sira nee,” hatete Reprezentante Prezidente Autoridade Munisipiu (PAMD), Gaspar da Silva ba jornalista sira iha AMD, Segunda (18/11/2024).
Nia dehan, Autoridade lokal sira iha kompetensia atu tau matan ba nia komunidade sira neebe faan sasan iha dalan hodi labele ukupa fatin publiku sira, tanba governu perepara ona merkadu ba sira.
Tanba foin lalais SEATOU mai sobu no baku rahun Vendadores sira nia sasan, tuir los ida labele akontese, tanba komunidade sira nia moris mak faan sasan iha dalan hodi buka moris.
Iha fatin ketak, Xefe Suku Komoro, Eligio Jose da Silva Marçal hatete, hanesan Autoridade lokal sempre tau matan ba nia komunidade sira neebe faan sasan iha dalan, maibe kondisaun moris ema nian mak hanesan nee ona, Autoridade lokal sempre fo hatene ba Vendadores sira atu labele faan sasan iha trotoal leten, maibe ema barak liu entaun nafatin akontese.
“Hanesan Autoridade lokal ami sempre fo hanoin ami nia komunidade sira atu faan sasan karik labele okupa fatin publiku, maibe kondisaun fatin mak hanesan nee ona, ema barak liu entaun ita fo hatene mos nafatin akontese,” nia esplika.
Nia hatutan, foin lalais akontese tan, SEATOU mai sobu vendedor sira nia sasan no baku rahun hotu, tuir los buat sira nee labele akontese, governu presiza kria uluk kondisaun depois mak haruka vendedor sira nee sai, se kria tiha kondisaun mak sira la sai mak ita bele uza meus seluk hodi hasai.
Nunee mos Vendedores Kampung Baru, Veronica da Costa esplika, estadu hakarak labele faan iha dalan ninin, liu-liu trotoar leten, maibe faan iha nee mak foin hetan osan US$1 ou US$ 2 ba susenta nesisidade uma laran.
(jen)
