DILI, STLTIMORLESTE.com – Governu Republika Popular Xina entrega ambulansia tolu (3) ba iha Timor Leste (TL), ambulansia nee hanesan hatan ba nesesidade urjenti povu TL nian, hodi reflete Xina nia apoiu ba tempu naruk no firme ba dezenvolvimentu hodi kuidadu mediku iha TL.
Embaixador Xina iha Timor Leste, Xu Danyang hatoo agradese ba Ministeriu Administrasaun Estatal (MAE) no Ministeriu Saude (MS) neebe mak apoiu makaas ba kooperasaun lokal no saude entre nasaun rua nee, espera katak viatura sira nee bele ajuda sai nivel atendimentu mediku iha Munisipiu Manatuto.
“Husi provinsia Hunan Republika Popular Xina no Munisipiu Manatuto nuudar realizasaun ikus liu husi kooperasaun provinsia Hunan no Munisipiu Manatuto, hodi reflete amizade husi povu Xina ba TL, tanba Xina ho Timor Leste iha progresu boot hodi halo amizade entre provinsia Hunan ho Munisipiu Manatuto sei besik liu tan,” katak Embaixador, Xu Danyang liu husi nia diskursu iha edifisiu MAE Kaikoli, Dili, Kinta (03/04/2025).
Embaixador TL, Xu Danyang hatete, Xina sei kontinua servisu makaas ho Ministeriu Administrasaun Estatal, Ministeriu Saude no Munisipiu Manatuto hodi promove rezultadu neebe boot liu tan iha kooperasaun saude provinsial lokal entre nasaun rua nee.
“Iha fulan Maiu tinan kotuk ami halao selebrasaun entre provinsia Hunan ho Munisipiu Manatuto iha fulan Outubru tinan kotuk Ministru Administrasaun Estatal, Tomas do Rosario Cabral lori Prezidente Munisipiu nain hitu (7) iha Timor hodi vizita provinsia Hunan, Primeiru Ministru Kay Rala Xanana Gusmão sei lidera delegasaun ida hodi vizita fali provinsia Hunan, kooperasaun provinsial sai hanesan destake ida husi kooperasaun entre Xina no TL iha area oinoin,” katak Xu Danyang.
Iha fatin hanesan, Prezidente Autoridade Manatuto (PAM), Luis Fernandes deklara, nia parte reprezenta povu Munisipiu Manatuto nia naran hato’o agradese profundu ba Governu Xina ne’ebe oferese ona apoiu ambulansia rua ba iha povu Manatuto.
“Hodi populasaun Manatuto nia naran hakarak agradese ba Governu Xina husi provínsia Hunan ne’ebe antes ne’e kria tiha ona amizade entre povu Hunan ho povu Manatuto iha tinan 10 ba kotuk, agora atu tama ba tinan 11,” Katak PAM, Luis Fernandes.
Nia haktuir, ho doasaun ambulánsia tolu ne’e aumenta tan lista lubuk bo’ot ida ne’ebe Munisipiu Manatuto simu ona husi Provinsia Hunan Republika Popular Xina iha tinan hirak ba kotuk hodi promove kooperasaun provinsial.
“Primeiru sira dezenvolve relasaun hamutuk ho Munisipiu Manatuto, hodi apoiu setor agrikultura fulan kotuk ami simu tan makina perfurasaun bee moos ida, agora Munisipiu Manatuto simu tan ambulansia rua no ambulansia ida oferese ba iha HNGV,” katak nia.
(EST 2)
