BAUKAU, STLTIMORLESTE.com – Durante fulan Abril tinan nee, Diresaun Munisipal Konservstoria Servisu Rejistu Notariadu (DMCSRN – sigla português) Munisipiu Baukau simu aplikante trata pasaporte eletroniku hamutuk nain 181, maibe reseitas neebe aplikante sira kontribui, DMCSRN Munisipiu Baukau labele fo sai nia totalidade, tanba aplikante selu iha banku.
Diretora DMCSRN Munisipiu Baukau, Justina das Neves Mendonça relata, atendimentu pasaporte eletroniku iha DMCSRN Munisipiu Baukau lao normal, tanba atendimentu lao tuir orariu neebe parte nasional implementa.
“Total mak fulan Abril nian hamutuk 18 neebe mak asesu halo pasaporte husi Munisipiu Baukau ho folin US$ 50, US$ 75.00 no US$ 100.00, mane 114 no feto 67,” hateten Justina ba STL iha knaar fatin Vila Nova Baukau, Segunda (02/06/2025).
Nia sublina, kustu tratamentu pasaporte ba aplikante neebe presiza urujente dentru oras 24:00 selu US$ 100.00 no prazu loron tolu selu US$ 75.00, maibe parte DMCSRN Munisipiu Baukau fasilita deit fixa ba nain hodi foti direitamente iha Nasional, tanba loron limitadu atu ofisial pasaporte Munisipal ajuda.
Enkuantu aplikante selu US$ 50.00 ajuda husi ofisial pasaporte foti iha Nasional atribui ba nain pasaporte iha edifisiu DMCSRN Baukau, maibe kona-ba kustu hotu kada aplikante selu iha banku.
“Ami la simu osan direira husi aplikante, maibe osan hirak nee aplikante selu direitamente iha BNCTL, tanba ida nee mak ami la fo nia kuatidade osan neebe mak rekolha husi pasaporte,” Justina akresenta.
Entretantu aplikante pasaporte eletroniku iha DMCSRN Munisipiu Baukau nee kompostu renovasaun pasaporte nain 42 no trata pasaporte foun 139.
(tom)
