DILI, STLTIMORLESTE.com – Direjente Responsavel husi munisipiu sei fo formasaun kona-ba lalaok implementasaun merenda eskolar ba direjente husi eskola sira.
Lia hirak nee hatoo husi Xefe Departementu Programa Merenda Eskolar iha Ministeriu Edukasaun (ME), Belchior Maria Almeida Barros ba jornalista STL iha nia knaar fatin Vila Verde, Kuarta nee (04/03/2026).
“Ida nee mos ami entrega ba iha munisípiu sira no ami hein halo koordenasaun deit ho sira, tanba nee ami hein halo deit monotorizasaun, se lae buat hotu-hotu sira depende deit mai iha nasional, nee duni buat hotu ita entrega ba sira, oinsa mak sira atu organiza. Ita nian direjente sira responsável iha munisípiu, liu-liu hanesan Diretor Saude Munisipal, Diretor Finansas Munisipal, Diretor Fiskalizasaun Munisipal no Diretor Edukasaun Munisípiu, nee sira nian servisu, sira mak sei fo formasaun ba ita nian direjente husi eskola sira,” nia informa.
Nia dehan, husi ME nasional fo ona informasaun ba direjente responsavel munisipal sira neebe mak ohin mensiona, sira mak sei organiza formasaun nee ba direjente eskola sira, husi nasional nafatin fo asistensia ba sira atu nunee oinsa mak formasaun nee bele lao, bainhira fo informasaun ba nasional, oinsa mak atu buka solusaun ba ida nee.
“Se lae buat hotu hein deit husi nasional, nee ita sei la rezolve problema, direjente husi eskola slra neebe sei partisipa iha formasaun kona-ba implementasaun merenda eskolar sira nee mak hanesan Koordenador Pre eskolar, Filial, Diretor EBC no GAT sira, ita haree liu ba GAT nomos grupu komunitariu sira,” dehan nia.
Iha fatin seluk, Diretor Servisu Edukasaun Munisipiu Ainaro, Patricio da Costa Magno hatete, formasaun ba direjente eskola sira, liu-liu kona-ba oinsa mak atu implementa programa merenda eskolar iha eskola sira.
“Hau hanoin kona-ba formasaun ba direjente eskola sira, liu-liu kona-ba oinsa mak atu implementa programa merenda eskolar iha eskola sira,” nia esplika.
Nunee mos Diretor EBC Manleuana, Carlos Correia dehan, uluk sira partisipa ona formasaun kona-ba oinsa mak atu implementa merenda eskolar nee ho diak iha eskola, hodi nunee estudantes sira asesu merenda ho diak.
(jac)
