BAUKAU, STLTIMORLESTE.com – Loron 20 Maiu tinan nee, Timor Leste selebra loron Restaurasaun Independensia ba dala 23, maibe dezenvolvimentu iha rai laran lao sei lentu.
Tuir Xefe Suku Samalari, Postu Administrativu Baukau Vila, Munisipiu Baukau, Rui Sertório Magno Siqueira, Timor Leste nia Restaurasaun Independensia too ona dala 23, iha ona kondisoens balun hanesan eletrisidade, estrada, bee moos no seluk tan neebe Governu responde ona, maibe seidauk masimu, tanba povu balun iha area remotas sei halerik ba estrada, eletrisidade, bee moos no seluk tan.
“Normalmente selebra tinan ba dala 23 nee dezenvolvimentu lao neneik liu, razaun tomak orsamentu jeral neebe sira aprova ho programa neebe iha atu implementa Governasaun troka malu, maibe matrix servisu la entrega ba malu mak ita ukun aan progresu dezenvolvimentu lao neineik,” hateten Rui ba STL iha Vila Nova Baukau, Domingu (18/05/2025).
Xefe Suku nee hateten, impkatu husi dezenvolvimentu lao neineik no tarde, tanba kauza husi Orsamentu Jeral Estadu kada tinan neebe Governu aprova valor kiik la responde ba kondisoens hotu husi Nasional too area remotas.
Nia sublina, kondisoens sira too iha nivel Suku no Aldeia neebe durante Restaurasaun Independensia ba dala 23, seidauk responde masimu mak infraestrutura Edukasaun, Saude, Agrikultura no seluk tan neebe povu prezisa.
“Governu aloka orsamentu tenke tuir matrix dezenvolvimentu, se fokus ba dezenvolvimentu iha setor agrikultura karik, tau osan barak iha neeba, setor edukasaun karik tau osan barak iha neeba, ita labele hakfodak halo hotu iha tinan ida, maibe tenke prioridade ba ida atinji too metas, se ita hakarak programa 10 dala ida, otomatika tenke hakadasak, lao mos lao neineik liu,” nia hateten.
Xefe Suku nee rekomenda, prezisa Governu halo dezenvolvimentu tau prioridade ba setor ida iha tinan ida, nunee bele iha kbiit responde, maibe hakarak avansa ho programa prioridade 10 dala ida, sei la responde preokupasaun hotu, tanba Orsamentu Jeral Estadu neebe kada tinan Governu aprova montante kiik atu kobre munisipiu sira too nivel aldeia.
Enkuantu tuir Administrador Postu Administrativu Kelikai, Paul Jacinto Moreira katak, Restaurasaun Independensia too ona dala 23, kuaze preokupasaun komunidade nian ba estrada, bee moos, eletrisidade no seluk tan responde ona mezmu fazeadamente, maibe presiza dezenvolve liu tan nunee povu sente benefisiu husi ukun aan.
“Atu kontinua dezenvolvimentu mak primeiru estrada rurais seidauk diak nomos setor agrikultura presiza hadia diak liu tan, tanba natar barak mak seidauk utiliza no hortikultura neebe mak komunidade presiza, nunee presiza foku ba irigasaun,” hateten Paul.
Tuir Administrador Postu Kelikai nee katak, prezisa Governu preve orsamentu boot ba dezenvolve liu tan estrada rural sira iha area remotas, tanba barak kondisaun aat, difikulta komunidade transporta produtu lokal asesu merkadoria.
Aleinde mos Governu prezisa investe makaas iha setor agrikultura, liu-liu dezenvolve irigasaun sira hodi oferese bee ba natar sira no hamoris area ortikultura hodi reduz produtu importadu neebe daudaun domina iha Timor Leste.
(tom)
