DILI, STLTIMORLESTE.com – Prezidente Republika (PR), Jose Ramos Horta hatete, atu rezolve problema Naktuka PR entrega konfiansa tomak ba Primeiru Ministru Kay Rala Xanana Gusmão nuudar Xefe Negosiador.
Prezidente Republika Jose Ramos Horta hatoo kestaun nee ba jornalista sira iha Timor Plaza Sabadu nee (03/05/2025) hatete, atu rezolve problema naktuka entre Timor Leste ho nasaun vizinhu Indonezia, Prezidente Republika entrega konfiansa 100% ba Primeiru Ministru nuudar Xefe Negosiador.
“Hau entrega konfiansa 100% ba negosiador Xefe Maun Boot Xanana Gusmão para rezolve ida nee liu husi negosiasaun amigavel ho Indonezia, ita nia pozisaun sempre iha tratadu Holanda ho Portugal, maibe tratadu Holanda ho Portugal tinan lubuk liu ba ona dala ruma ita halo fronteira tuir parte natureza nia ezemplu tuir mota dalan, uluk halo nunee maibe mota dalan nee muda tiha ona,” dehan Prezidente Republika.
Prezidente Republika hatete, se rezolve tuir mota dalan, se mota nee halai tama Indonezia ou halai tama Timor Leste bele rezolve tuir ida nee ka? Ou rezolve tuir pontu neebe uluk tuir Holanda ho Portugal nia, maibe ida nee entrega tomak ba Xefe negosiador mak rezolve.
“Ida nee entrega 100% ba Primeiru Ministru, estadu nasaun tomak tenke apoiu ita nia negosiador, labele partidu sira halo fali politizasaun, manipulsaun ho opinaun publiku ba ida nee,” dehan PR Horta.
Prezidente Republika hatete, atu rezolve problema Naktuka nee defende Soberanu, tanba nee estadu no partidu hotu-hotu presiza fo apoiu labele halo politizasaun ou manipulasaun liu husi opinaun publiku.
“Tanba rezolusaun Fronteira terestre mantein relasaun estabilidade iha fronteira, mantein relasaun metin ho Indonezia, nee intrese nasional ita nia,” hakotu PR Horta.
(eme)
