DILI, STLTIMORLESTE.com – Ho kolokasaun bolsa kandidatu profesores ba nivel ensinu baziku bele rezolve ona ensinu aprendizajen ba estudante sira iha nibel ensinu refere.
Diretor Servisu Edukasaun Munisipiu Manatuto, Patricio da Cruz Quintao hatoo lia hirak nee ba jornalista STL liu husi telefone, Segunda nee (28/04/2025).
“Agora kona-ba profesores, ensinu baziku ita bele rezolve ona problema, maibe sekundariu jeral mak agora foin iha rekrutamentu, maske ita iha difikuldade kona-ba menus profesor, maibe ho sira nian jestaun orsamentu neebe inan aman sira jere rasik nee bele sustenta hela, hodi hein rekrutamentu foun, tanba nee ba nivel ensinu baziku bele rezolve ona problema,” dehan nia.
Patricio dehan, iha eskola balun deit mak sira sei aplika hela multi klase nee, maibe agora ho planu kolokasaun tan nee, hanoin ida nee bele ona, total ensinu baziku iha Munisipiu Manatuto nee hamutuk 18, nee kompostu husi ensinu baziku publiku, privadu no katoliku, total bolsa kandidatu profesores neebe koloka mai iha Manatuto nee kuaze 100 resin ona.
“Nee duni iha nivel ensinu baziku iha Manatuto nee ita bele rezolve ona, maske iha eskola ida rua mak sei enfrenta hela aplika multi klase, maibe ladun iha problema ida, tanba ita simu ona kolokasaun profesores husi Ministeriu,” dehan nia.
Iha fatin seluk, Diretor Nasional Ensinu Sekundariu iha ME, Benjamin Gomes da Cruz Fernandes hatete, ho rekrutamentu bolsa kandidatu profesores nee bele rezolve eskola sekundariu balun neebe sei menus profesores.
(jac)
