DILI, STLTIMORLESTE.com – Rede Feto Timor Leste (RFTL) ho membru sira apresia ba Governu bele promove feto hodi asumi kargu importante nuudar Segundu Komandate Polisia Nasional Timor Leste (PNTL).
Lia hirak nee hatoo husi Prezidente Rede Feto Timor Leste, Zelia Fernandes ba jornalista STL iha nia knaar fatin, Kinta nee (26/03/2026).
Nia hatete, RFTL ho membru sente orgulhu tanba Governu promove ona feto iha PNTL.
Prezidente Ezekutivu RFTL hatete, pontus importante ba deklarasaun imprensa
Rede Feto Timor-Leste nuudar plataforma advokasia neebe hamriik hodi asegura direitu humanu feto no labarik feto nian, ohin mai hamutuk ho membru sira hanesan FOKUPERS, Sagrada Familia no mos parseriu estratejiku sira ne’ebe involve iha grupu trabalhu advokasia ne’ebe involve JSMP, mane ho vizaun foun no organizasaun kongratula promusaun deviza iha PNTL liu-liu hahu promove ona feto iha kargu topu seguransa nian PNTL.
“Ami respeita no apresia mekanizmu Institusaun PNTL no vontade no esforsu ekipa ou komisaun promusaun neebe halo ona nia papel hodi promove pesoal balun,” katak Prezidente Ezekutivu.
Iha biban nee Rede Feto Timor Leste ho membru sira hatoo solidariedade ba feto maluk iha PNTL neebe nafatin hasoru diskriminasaun.
“Ami respeita tebes, apresia no solidariza ami nian feto maluk sira ne’ebe hasoru situasaun ne’ebe la justu iha desisaun promusaun nian, hanesan mana Julia Gama nian kazu, ami elojia korajen no fuan boot mana Julia Gama hodi fahe ona provas no faktus sira relasiona hodi defisiensia sira iha institusaun PNTL nian,” katak nia.
Nia hatutan, hanoin katak ida nee importante hodi inspira maluk sira liu-liu feto sira atu labele nonok ba situasaun sira neebe infrakeja institusaun, maibe favor koalia sai saida mak la fo vantajen ba institusaun estadu nian hodi buka mekanizmu no solusaun.
Aleinde nee Prezidente Republika Jose Ramos Horta hatete, se diak liu nee feto mak lidera PNTL.
Prezidente Republika hatete, tuir nia haree ohin loron feto barak iha kapasidade no matenek neebe bele lidera instituisaun Estadu, Governu no setor privadu sira.
(eme)
