DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu inisial RNG no arguidu KWP, tanba komete krime Arma Branka.
Tuir akuzasaun katak iha loron 25 fulan Julhu tinan 2022, por volta 22h:00 kalan, lezadu AdG joga hela Bola Gulin (BG) iha Aitarak laran, kampun Alor.
Por volta 00h:50 lezadu AdG sinte malirin sai husi fatin Bola Guling atu ba sosa sigaru, maibe arguidu RNG sikat tudik iha kanotak hodi korta nia no hateten sira nain rua atu tuku malu.
Lezadu AdG nonok deit, tanba arguidu ho nia kolega sira barak no tenta atu ses mos la diak.
Arguidu hasai tudik husi nia kanotak hodi entrega ba iha arguidu KWPdS, la kleur testemunha Estefanio Dos Santos Sidalia hakilar hodi kaer kedan arguidu sira no halo aprensaun ba tudik neebe sira pose.
Arguidu sadik lezadu atu baku malu, tanba antes nee lezadu ho nia kolega sira atu baku nia.
Arguidu hatene katak bainhira lori tudik iha fatin publiku no sadik ema atu baku malu nee lei bandu, maibe arguidu lori nafatin.
Konsekuensia husi arguidu lori tudik iha fatin publiku bele halo ema tauk no trauma.
Arguidu halo krime ho livre, deliberada, konsentemente no hatene katak hahalok nee lei bandu no kastigu tuir lei.
Arguidu sira hanesan ko-autor material ba krime Armas Brankas tuir lei numeru 5/2017.
Hatan ba akuzasaun nee, arguidu RNG deklara ba Tribunal katak, iha momentu nee nia lori tudik husi Ai-Tarak laran lori ba Kampung Alor atu baku malu ho lezadu, tanba antes nee arguidu ho lezadu iha problema, nunee iha kalan nee lezadu iha mate uma mak arguidu ba Kampung Alor.
Arguidu deklara katak, nia intensaun lori tudik nee atu fai lezadu subar deit, maibe la konsege, tanba arguidu fo fali tudik ba nia alin mak kaer. No iha problema nee tanba lezadu mak husu arguidu atu baku malu.
Arguidu RNG konfesa katak, hafoin problema nee mosu arguidu ho lezadu diak malu fali no daudaun nee arguidu ho lezadu servisu hamutuk.
Arguidu KWPdS nuudar arguidu RNG nia alin konfesa ba Tribunal katak, iha momentu neeba arguidu tuur iha motor leten mak arguidu RNG fo tudik ba nia, tanba nia taka hela BG, maibe nia la hatene problema nee saida no derepente SNI mai kaer sira.
Lezadu AdGA deklara katak, nia haree duni arguidu lori tudik. Tanba iha momentu neeba lezadu ho arguidu sadik malu atu baku malu, maibe la konsege baku malu. No tudik nee arguidu RNG fo fali ba arguidu KWPdS, maibe nia la halo buat ida.
Rona tiha deklarasaun husi arguidu nain rua, tama kedan ba iha alegasaun.
Iha alegasaun Ministeriu Publiku husu Tribunal atu aplika pena minimu no suspende ba tinan tolu (3) ba arguidu RNG no ba Arguidu KWPdS, Ministeriu Publiku husu Tribunal atu absolve ba iha krime neebe mak Ministeriu Publiku imputa ba nia.
No parte Defeza aseita ba alegasaun Ministeriu Publiku nia, tanba haree faktus sira katak arguidu konfesa imparsial.
Hafoin rona tiha alegasaun, Tribunal deside muda ba loron 14 fulan Janeiru tinan 2026 ho tuku, 10:00 dader hodi rona desizaun ikus.
Audensia julgamentu nee prezide husi Juiz kolektiva, Jumiaty Freitas, José Gonçalvez no José Quintão, Ministeriu Publiku reprezenta husi Prokurador, Pedro Baptista, no arguidu nain rua hetan asistensia legal husi Defensor Publiku Sergio Dias Quintas.
Jornalista: Terezinha De Deus
