AMBENO, STLTIMORLESTE.com – Prezidente Autoridade Rejiaun Administrativu espesial Oekusi Ambeno, Rogerio Tiago de Fatima Lobato, akompanha husi Koodenador Komisaun Ezekutiva Zona Ekonomika Espesial ba Dezenvolvimentu Oekusi Ambeno (KEZEEDOA), João Mendes Goncalves ho Visi KEZEEDOA, Regio da Cruz Salu, simu delegasaun husi Jakarta Indonezia atu Investe Setor Turizmu iha Oekusi.
Delegasaun nee Xefia husi Sufmi Dasco, Adjuntu Reprezentante Povu Indonezia (Dewan Perwakilan Rakyat Indonesia (DPRRI) asuntu Ekonomia no finansas ho Ahmad Sahroni nuudar Adjuntu Komisaun III, DPRRI, akompanha husi Eis Governador Nusa Tenggar Timur (NTT), Viktor Bungtilu Laiskodat no Rafi Admad nuudar Advisor Prinsipal Prezidente Republika Indonezia, Prabowo Subianto iha Palasiu Presidensial Jakarta Indonezia, too iha Aeroportu Internasional Rota do Sandalu Oekusi ho aviaun Privadu T7DGA, tuku 11:23, simu direitamente husi PARAEOA ho KEZEEDOA, bidu husi grupu feto Oekusi no tara tais, nunee delegasaun hakat ba Gabinete PARAEOA halao enkontru naktaka ba publiku durante 45 minutus.
Sufmi Dasco nuudar Xefe Adjuntu Reprezentante Povu Indonezia (Dewan Perwakilan Rakyat Indonesia (DPRRI) asuntu Ekonomia no finansas Indonezia, liu husi konfrensia imprensa iha Salaun VIP Aeroportu Internasional Rota do Sandalow Oekusi ba jornalista sira Sesta (22/11/2024) katak, sira hetan informasaun husi maluk sira iha Timor Leste (TL) dehan Oekusi nuudar rejional espesial no iha Aeroportu neebe luan no Aeroportu neebe boot liu Aeroportu Dili no rai Oekusi furak tebes.
Husi informasaun hirak nee, ohin ami mai lori maluk emprezariu boot sira husi Indonezia atu halo investimentu iha Oekusi, iha setor Turizmu no setor industria seluk, inklui atividades komersiu IndoneziaTL liu husi Oekusi. Hau haree TL nee potensial tebes tanba rai ida nee furak tebes, tanba nee ita sei halo investimentu iha setor Turizmu, atu dudu kresimentu ekonomia iha Rai Timor espesialmente iha Oekusi ba mundu internasional liu husi seitor Turizmu, tanba nee atu dada turista sira mai Oekusi, presiza kria kondisoens uluk lai.
Iha Biban nee, Eis Governador Nusa Tenggara Timur (NTT), Viktor Bungtilu Laiskodat dehan, Rai Timor diferente tebes ho rai sira selukseluk iha Mundu, ilha ida nasaun rua, One Iland but tow Country, Ilha kiik ida maibe nasaun rua, Small Iland but tow Country no iha ilha Timor ejiste ona Aeroportu 4, ida maka iha Kupang, ida iha Oecusse, ida fali iha Dili no ida seluk fali iha Suai, ida nee infraestrura neebe previlejiu tebes iha ilha Timor.
“Ita foti deit ezemplu Aeroportu iha Oekusi, Aeroportu neebe luan no boot liu husi Dili, ida nee oportunidade neebe maka boot tebes, ba emprezariu Timor oan tomak atu utiliza no tuir diskusaun neebe lao ona, hahu fulan Fevereiru tinan 2025, tenke funsiona halo operasaun ba aviaun sira husi nasaun neebe deit, bele landing iha Oecusse, tanba nee ita tenke diskuti beibeik ho Primeiru Ministru, Kay Rala Xanana Gusmão nomos Prezidente Republika Indonezia, Prabowo Subianto, atu nunee bele utiliza ona Aeroportu ida nee atu bele halo operasaun 24 oras kada loron,” dehan nia.
Nia haktuir tan katak, atu dada Turista barak mai Oekusi, presiza prepara infraestrutura balun iha Oekusi ho akomodasaun nunee bele utiliza hodi fo atendementu neebe diak liu tan ba turista sira neebe maka mai vizita Oekusi.
Iha oportunidade nee, Rafi Ahmad nuudar advisor prinsipal Prezidente Republika Indonezia, Prabowo Subianto dehan, governu Indonezia sempre nakloke atu kria kooperasaun serbisu hamutuk hodi dudu dezenvolvimentu iha seitores hotu-hotu iha pais neebe deit mak iha interese atu koopera hamutuk.
“Ita hatene katak Indonezia sempre iha fuan domin ba Timor Leste, nunee mos Timor Leste sempre iha fuan domin ho Indonezia, tanba nee nasaun rua nee maske iha istoria tempu pasadu maibe hanesan hau, foin mai primeiraves iha Oekusi, hau laran monu kedan no hadomi rai no povu Oekusi, ita bele dehan previlejiu mundu nian iha Timor Leste (Surga dunia ada di Timor Leste),” dehan nia.
Nia haktuir tan katak, sorumutu ida nee sei kontinua nafatin tanba ohin mai vizita Oekusi, hanesan inisiu no sei kontinua vizita hodi diskute klean atu hamutuk dezenvolve seitor Turizmu iha TL, tanba iha Indonezia total populasaun 300.000.000 resin, entaun iha neeba agora daudaun buka fatin atu kontente deit ona, tanba nee Rejiaun espesial Oekusi bele sai fatin laos deit ba Indonezia no TL, maibe ba povu iha mundu tomak bele mai Oecusse, nee duni tenke prepara kondisoens.
“IndoneziaTL hanesan nasaun vizinhu neebe iha ligasaun diak tebes, tanba nee ita presiza hametin kooperasaun diak liu tan, atu halo investimentu ida neebe maka furak no diak, atu bele fo benefisiu ba povu rai rua nee ba futuru, tanba nee ami sei kontinua vizita Oekusi atu halo diskusaun klean liu tan, kona ba investimentu neebe maka atu realiza iha Oekusi,” dehan nia.
Iha oportunidade nee, PARAEOA, Rogerio Tiago de Fatima Lobato konfesa katak, sente kontente tanba vizita ohin husi nai ulun sira husi Indonezia akompanhia kedan husi emprezariu nasaun vizinhu, ida nee previlejiu tebtebes Indonezia ho TL ninia amizade nee, furak tebtebes.
“Agora ita relasaun ida nee realiza liu husi asaun konkretas, maluk sira nasaun vizinu Indonezia bele mai halo investimentu iha Oekusi, ita bele serbisu hamutuk ho sira atu halo Aeroportu Oecusse bele sai Aeroportu Internasional, nunee sira mos bele manan osan, ita mos bele manan osan,” dehan nia.
Iha okaziaun nee, KEZEEDOA, Joao Mendes Goncalves dehan, vizita ida nee kona lolos ho programa estratejiku Komisaun Ezekutivu ZEEDOA nian iha Oekusi.
“Vizita ida nee kona lo-loos ho programa estratejiku Komisaun Ezekutivu ZEEDOA nian iha Oekusi neebe ami prepara ona, atu lori ba iha Konselhu Ministru, tanba area turizmu ita presiza investe iha buat barak iha Oekusi, tanba rai Oekusi iha potensial tebtebes ba oin iha area turismu, entaun ita presiza kompletu buat balun iha Aeroportu nee para alende sertivika ita nia Aeroportu diak ida nee, ita presiza mos infraestrutura balun iha Aeroportu iha laran hanesan fatin ida ba sentru lojistika no seluk tan, tanba nee ekipa neebe maka ohin mai vizita Oekusi, prontu ona atu investe, hodi fo benefisiu ba sira nomos ba ita,” dehan nia.
Tuir observasaun STL, vizita delegasaun husi Governu Indonezia akompaha husi Emprezariu sira, halao enkontru, kontinua almosu no iha lokraik, abertura eventu Gragrace motor iha Oecusse, atu anima povu iha ambitu komemorasaun loron proklamasaun Independensia 28 Novembru tinan 2024, nunee kontinua vizita fatin investimentu iha kolan Sina iha Lifau nunee ekipa fila ba Jakarta Indonezia.
(jos)
