DILI, STLTIMORLESTE.com – Ministeriu Publiku (MP) iha alegasaun ba krime Ofensa Integridade Fizika Grave husu Tribunal atu kondena arguidu inisial GdJ no MC prizaun tinan 2, tanba komete krime hasoru lezadu Ronaldo de Jesus Gomes Gusmao.
Iha alegasaun Prokuradora Lidia Soares deklara katak, faktus neebe konsta iha akuzasaun los duni katak, arguidu sira nia hahalok prienxe duni ba elementu krime neebe iha.
Tanba nee, Prokuradora Lidia Soares solisita ba iha Tribunal Koletivu atu aplika pena prizaun tinan 2 efetivu ba arguidu nain rua.
Enkuantu husi parte defeza nian husu Tribunal tetu deklarasaun sira hotu atu aplika pena neebe justu.
Rona tiha alegasaun, Tribunal adia ba loron seluk hodi rona desizaun.
Iha indisus sufisiente katak, iha loron 10 fulan Marsu tinan 2024 por volta 7h00 dader, fatin Bairo Pite, Dili, ofendido RdJGG ba sosa matabisu, la kleur arguidu sira hakilar, tanba nee nia mos para hodi hateten ba sira dehan hein lai hau ba rai matebisu.
Ofendidu rai hotu matabisu fila fali ba iha fatin akontesimentu hodi husu arguidu GdJ neebe sadik nia atu tuku malu, la kleur arguidu sira lori fatuk tuda kona testemunha Denilson Cleto dos Santos Ximenes.
Ofendidu atu ba ajuda testemunha Denilson, maibe arguidu GdJ lori ain tebe kona nia halo nia monu ba rai, arguidu sira sama nia no lori kadeira besi baku kona ofendidu nia kabas parte los hetan tohar too desmaia.
Arguidu sira halo agresaun hasoru ofendidu, tanba antes nee iha ona problema kona-ba artemarsiais neebe ofendidu mai husi PSHT no arguidu sira mai husi grupu Kera Sakti.
Konsekuensia husi agresaun nee halo ofendidu nia isin hetan kanek no tohar iha kabas parte los hodi afeta ba nia kapasidade atu servisu.
Arguidu sira hatene katak bainhira tebe, tuku no lori kadeira besi baku ema nia isin bele provoka kanek no tohar, maibe sira halo nafatin saida mak sira nia hakarak.
Arguidu sira hanesan ko-autor material ba krime ofensa ba integridade fizika grave previstu iha artigu 146 husi Kodigu Penal.
Audensia julgamentu nee prezide husi Juiz Koletivu, Ersilia de Jesus, Ana Paula, Jose Maria, Ministeriu Publiku reprezenta husi Prokuradora Lidia Soares, arguidu hetan asistensia legal husi Advogadu Privadu.
(ter)
